Ọ da dianẹ osio rhọ, yẹrẹ egbo rode yen avwanre cha wan, enana djẹ avwanre uyono ẹra-a. Diesorọ avwanre vwọ davwẹngba vwo kuomakuẹgbe, dede nẹ egbabọse rẹ akpeyeren herọ, oma je ghwọrọ avwanre nẹ iruo cha ọkiọvo?

O yovwin kẹ avwanre. Pọl si ọbe vwo rhe avwanre nẹ, a “jeje ohwohwo oma” ọkieje. (Hibru 10:24) Ota nana mudiaphiyọ nẹ, e “roro kẹ ohwohwo,” yẹrẹ a nabọ riẹn ohwohwo. Pọl jiriro kẹ avwanre nẹ ofori nẹ e vwo ọdavwẹ rẹ ohwohwo. Avwanre de sikẹrẹ iniọvo avwanre, ayen sa chọn avwanre uko vwo phi egbabọse avwanre kparobọ, kidie ọ sa dianẹ ayen ji hirharoku egbabọse tiọyena jovwo re.

Ọ nẹrhẹ avwanre dia igbeyan re kpẹkpẹre. Uvi rẹ igbeyan yen avwanre vẹ ayen gba vwoma vwẹ emẹvwa rẹ avwanre. O ji vwo ọke avwanre je vwọ heha kuẹgbe. Erere vọ yen avwanre mrẹ nẹ enana cha? E nẹrhẹ avwanre nẹ ohwohwo ghanghanre, ẹguọnọ avwanre kọ je ganphiyọ. Ọtiọyena, iniọvo avwanre de vwo ebẹnbẹn, kẹ avwanre chọn ayen uko, kidie avwanre vẹ ayen vwo oyerinkugbe ọgangan. (Isẹ 17:17) Siẹrẹ avwanre vẹ iniọvo na eje de kuomakuẹgbe, kẹ a sa “vwẹ ẹro te ohwohwo abavo.”​—1 Kọrẹnt 12:25, 26.

Jẹ igbeyan wẹn dia ihwo ri ruẹ ọhọre Ọghẹnẹ. Wọ cha mrẹ igbeyan tiọyena vwẹ uvwre rẹ Iseri ri Jihova. Biko kuomakugbe avwanre, wo jẹ emu vuọvo dawobọjẹ-ẹ.

• Diesorọ ọ vwọ dia emu erere avwanre vwo kuomakugbe iniọvo avwanre vwẹ emẹvwa?

• Ẹdẹ vọ yen wọ cha vwọ rhe omẹvwa avwanre?