Fandihanan̈a mivory io an̈isany raha maventy aminay Vavolombelon̈o Jehovah, fotony zahay avy mivory fo ndray mipetraka lavitry, na kajo baka miasa, na misy raha mampiasa loha na andra asara. Nan̈ino ma zahay samy mifen̈y man̈aton̈o fivorian̈a?

Mampahivankivan̈a ndreky mamparavoravo. Apostoly Paoly nivolan̈a tamindro Kristianin̈y tamy fiangonan̈a nisy izy taloha, fa iro mila mikoran̈a amy naman̈a, izikoa fa mivory. (Hebreo 10:24) Dikanizen̈y, olo jiaby mivory an̈y mila mifankahay. Zahay koa fa avy amy Tran̈o Fivorian̈a an̈y, zahay mikoran̈a aminolo tsendriky hainay na sambany nivory. Misy zahay fanojy olo mira raha manahiran̈a zahay, ke zahay mifan̈amia hevitry. Zahay manjary mahivankivan̈a, koa fa mody baka mivory.

Azahoan̈a naman̈a maro. Dikany handihananay mivory an̈y, tsy raha mivavaka fo, fa fanojy naman̈a jiaby koa. Lera andra tsy fivorian̈a, zahay koa mety mifamorivory miaraka misoma. Zen̈y aviany zahay mifankatia, mira olo kibo araiky. Koa fa misy namanay marary na sahiran̈a, zahay jiaby mifan̈ampy. (Ohabolana 17:17) Fahaizan̈a miaraka karaha zen̈y mahavy zahay mitambatra.—1 Korintianina 12:25, 26.

Tsara izikoa olo man̈ano sitrapony Zan̈ahary ataonao naman̈a. Amy Vavolombelon̈o Jehovah fo ahitanao olo karaha zen̈y. Zahay ravoravo, anao koa von̈ono hiaraka aminay.

• Ino ma mahatsara atsika mandeha mivory?

• Ombian̈a anao mba avy mivory miaraka aminay?