Nɩ bɔtʋ ndwomi, bɔbɔ mpayɩ, bosuma na bosunzu Ɛhɛlɛlɛ Odwokɔ nɩ ɩnwʋ wɔ Ahilisinyiamaa mɔɔ beli bɔmʋnlɩ nɩ bɛ ayiyialɩyɛ bela yɩ tʋ—nɩ bɛáyɛ ɔzʋ̃mɩnlɛ nu amanɩyɛ bela wɔ yɩ tʋ. (1 Kɔlɛntɩmaa 14:26) Sa ɔkʋla ekila ɔhʋanɩ kɛɛ ɔkɔnwʋ ɔzɔ la sʋ̃ wɔ yɛ ayiyialɩyɛ azʋlɔtʋ nɩ yɩ tʋ.

Ehilehilelɛ nɩ igyĩ Bayɩbʋlʋ ɩzʋ na ɔkʋla ɛfa ɛyɛ egyima. Wɔ dapɛnɩ yɩ awielɩyɛ nɩ, asafʋ bela beyiyia numɔ betiye miniti 30 Bayɩbʋlʋ nu ndɛnɩ mɔɔ ikile kezimɔ Ɛhɛlɛlɛ Odwokɔ nɩ ɩfalɩ yɛ ɛbɩlawɔlɛ nɩɩ mmɩlɩ mɔɔ yɛda nu sikalɛpɛyɩ nɩ nwʋ. Bɛhyɛ ye munwatĩĩ ɛzɩzɩbɛ ma yɛfa amɩyɛzayɛ yɛ Bayɩbʋlʋ yedi yɩ mɛda. Wɔ ndɛnɩ yɩ awielɩyɛ nɩ, yɛ wɔ dɔnɩhwɩlɩ ɔkʋ̃ “Watchtower” Dɩyɛzumanlɛ mɔɔ abiyela kʋla ma munwalɩyɛ wɔ ozumanlɛdɩyɛ mɔɔ ɩwɔ Watchtower ɔnwʋma nɩ yɩ nu. Ɔzɔ dɩyɛzumanlɛ nɩ ɩbʋwa yɛ ma yɛfa Bayɩbʋlʋ yɩ ɔhʋanɩhilelɛ yɛbɔ yɛ ɛbɩla. Ɔzɔ Watchtower dɩyɛzumanlɛ yɩ nɩ la yɛɛ abiyela suma wɔ asafʋ mɔɔ ɩbʋ 110,000 mɔɔ ɩwɔ oyuwadɩ yɩ dɩka bela nɩ a.

Bɔbʋwa yɛ ma yetu mpʋnɩ wɔ kezimɔ yekilehile nɩ nu. Yesia sʋ̃ yeyiyia numɔ wɔ dapɛnɩ yi nu yɛyɛ dɩyɛzumanlɛ be mɔɔ ɩwɔ afʋã asã mɔɔ bɔfʋlɔ yɩ kɛɛ Yɛ Kilisinyianɩ Ɛbɩlawɔlɛ Nɩɩ Dasɩlɛlilɛ mɔɔ igyĩ ndwokɔ mɔɔ bɛfa bɛba ezinyianɩ ezinyianɩ mɔɔ ɩwɔ Ɛbɩlawɔlɛ Nɩɩ Dasɩlɛlilɛ Dɩyɛzumanlɛ Kɛlɛta yɩ nu nɩ. Ɔfʋã mɔɔ ili bɔmʋnlɩ wɔ ayiyialɩyɛ eyi tʋ yɛ lɛ Bayɩbʋlʋ Nu Anwʋnyia mɔɔ ɩbʋwa yɛ ma yɛba yɛnwʋ Bayɩbʋlʋ yɩ ɔfʋã be mɔɔ asafʋ yi nu maa nɩ mmɔ beli bɔmʋnlɩ bɛɣɩnga nɩ. Mɔ ili ɔzʋlɔ yɛ lɛ Tú Mpʋnɩ Wɔ Dasɩlɛlilɛ Nu mɔɔ bɛyɛ yɛkile azʋlɔtʋ mɔɔ ikile kezimɔ yɛ nɩɩ mmenii mvʋlɔ kozuma Bayɩbʋlʋ nɩ. Fʋlɔdulɛvʋlɔ be ɩkɛyɛ nninyeni be ndwɩ wɔ egyimalilɛ azʋlɔtʋ yi nu kɛmɔ ɩkɛyɛ na ɩawʋwa yɛ ma yɛadu mpʋnɩ wɔ yɛ ɛɣɩngalɛ nɩɩ ɛdɩndɛlɛ nu. (1 Timoti 4:13) Ɔfʋã mɔɔ ili awielɩyɛ kʋlaa nɩ yɛ lɛ Kilisinyiamaa Bɛ Ɛbɩlawɔlɛ, ikile kezimɔ yɛkɛva Bayɩbʋlʋ nu egyinalɛzʋ-ndwokɔ mɔɔ ɩyɛ egyima nɩ yekeli egyima wɔ yɛ ɛbɩlawɔlɛ nu eɣile bela. Ndwokɔɣizialɛ nɩɩ munwalɩyɛ nkɔmɔwɔlɛ mɔɔ ɩma yɛtɩ Bayɩbʋlʋ yɩ tʋ yɛkɔ aɣinzi nɩ ɩkɩnla ɔzɔ dɩyɛzumanlɛ nɩ nwʋ.

Sɛ ɔkɔ yɛ ayiyialɩyɛ be a, pɩlazunlɛ bela íni ɔnwʋmɔ kɛɛ, Bayɩbʋlʋ nu ehilehilelɛ mɔɔ ekenyia yɩ nɩ ɩkɛyɛ wʋ asibɔnwʋ.—Dwɔɔnʋ 6:45.

• Mɩnla yɛɛ ɔkɔhʋla ekehila ɔhʋanɩ kɛɛ ɛkɛdɩ wɔ Gyehova Dasɩvʋlɔmaa be ayiyialɩyɛ yɩ tʋ a?

• Yɛ dapɛnɩ ayiyialɩyɛ ɛhɩnla dɩyɛ yɛɛ ɛkɛbɛyɩ kɛɛ ɔkɔhɔ ebiye a?