Kletiɛn ˗nu ˈwo kun ˗kwɛ këŋ do ˗blɛɛsü ˈgü, ˗an ˗bha ˗bhɔkwëë ˗nu ˈwaa kun ꞊dhɛ ˗Zlan ˗gbakɔ wɛɛ ˗bhaa ˗nu ˈdhö. ˗Wo ˈˈtan ˗bho, ˈwo ˗bhɛɛ ˗Zlan ˗dhɛ, ˈwo Biblö ˈˈɲan ˗nu ˗wo pö ˗an ˗ta, ˈyö ˈwo ˗an ˈˈdoo dɔ. (1 Kodhɛngtö 14:26) Pë do bhë, ˈnën ˈyi˗ ˗kë ꞊dɛɛ yi ˗bha ˗bhɔkwëë ˗nu ˗ta.

˗Wo yi ꞊klaŋ ˗kë Biblö ˈka. ˈˈSɩyi ɛɛnˈˈ ˗tɛɛdhoowayi ˈˈpɛpɛ ˈka, ˗zlanwokɔdhi ˗dhɛ ˈö ˈdhö ˗a ˈgümɛn ˗nu ˗dho wo ˈkwëëdhö ˈö ˈwo wo ˈˈtʋ ˈto ˈˈdhɛɛtadhiaŋ˗ ˈö ˗gban Biblö ˗ta, ˗a ˗bha minitö ˈö ꞊mɔɔn minitö 30 ˗bha, ˗a ˈˈpiʋ̈. ˗A ˈˈdhɛɛtadhiaŋ˗ ˈö ˈdhʋ̈, ˗kɔ ˈyi ˗dho ˈtɔŋ˗ ˗nu ˈwo Biblö ˈgü ˗an ˗ya ꞊bhlëë ˈgü ˗a ˈka yi ˗bha ˗tosɛta ˈgü ꞊dɛɛ, ˗a ˗zɔn yi ˗dhɛ. Mɛn ꞊gban ˈˈpɛpɛ ꞊faan ˗yö ˈmën ˗sü ˈka kö ˗wo wo ˗bha Biblö ˈsü kö ˗a ˈˈɲan ˗nu ˈö ˈˈdhɛɛtadhiaŋzëmɛn ˗dho ˗a ˗wo pö bhë, ˗wo ˈto ˗an ˈˈpiʋ̈. ˈˈDhɛɛtadhiaŋ˗ ꞊ya ɲën, ˈö ˈyi ˗ya “ La Tour de Garde ” draansü ˗bha. ˗Yö ˗kë ˈˈdoo ˈö˗ ˗gɛn ˈdhö ˗gban ˗sü ˈka ˈˈsu ˗bha ˈsëëdhɛ ˗be ˈnën ˈwo˗ ˗dhɛ La Tour de Garde ˗dhɛ ˈö draanˈˈ ˗bhaa ˈka, ˗a ˈwɔn ˗gɔ do ˗ta, ˗a ˈka. ˗A draansü ˗yö yi ˗takun kö ˈyi ˈtɔŋ˗ ˗nu ˈwo Biblö ˈgü ˗an ˗ya ꞊bhlëë ˈgü. Yi ˗a ꞊draan ˈˈlɛlɛ do ˈˈpiʋ̈. ˗A ˈwɔn ˗gɔ do bhë, ˗wa ꞊draan ˈpö yi ˗bha ˗zlanwokɔdhi ˗nu ˈwo ꞊mɔɔn ˗zlanwokɔdhi 115000 ˗bha ˈˈkpɔnŋtaadhɛ ˗todhʋ̈sü ˈgü, ˗an ˈgü.

˗Wo mɛn ꞊klaŋ ˗kë Biblö ˈka ˗kɔ ˗zɔn yi ˗dhɛ. Yi ˗dho yi ˈkwëëdhö ˈpö ˈˈdhoogɔ ꞊zinŋ ˈgü do kö ˈɲënŋ˗ ˗gɔ ˗ya ˗pö ˈö ˈyi ˗bhɔkwëë ˈö ˈˈpian ˈdhö ˗yaaga, ˗a ˗kë. ˗A bhɔkwëë ˈö ˈˈdhʋ̈, ˗wa ˗dhɛ Kwa ˗bha ˗kë Kletiɛn ˈka ˗sü waa kwa ˗bha ˗zlanwopö ˗yö. ˗A ˈgüwɔn ˗nu ˗wo Kwa ˗bha ˗kë Kletiɛn ˈka ˗sü waa kwa ˗bha ˗zlanwopö ˗yö ˗bhɔkwëë ˗kë ˗a ˈka ˈsëëdhɛ ˈgü. ˗A ˈˈpian ˗blɛɛsü ˈnën ˗tɔ: Pë ˗sɛŋbɔ ˗nu ˈwo ˗Zlan ˗wo ˈgü. ˗Yö yi ˗takun kö Biblö ˈˈpian ˈyi˗ ˗wo pö ˈˈdhiʋ̈ ˗be, ˈyi˗ ˈgüman ˗së ˈka. ꞊Ya ˈgo mü, ˈyö Ü ˗bha ˗zlanwopösü ˈkun ˈˈgbɩɩ˗ ˈˈpian ˈdhö yö mü. ˗A ˈˈpian bhë˗ ˈgü, yi ꞊dhegblü ˗nu ˗wo ˗zlanwopö ˗kɔ ˈˈslö ˗nu ˗zɔn yi ˗dhɛ. ꞊Wa wo bo, ˈyö ˗bhɔkwëëdhiʋ̈sümɛn ˗yö ˗dhioo ˗nu ˈwo ˗dho yi ˗takun kö ˈyi ˈsëëdhɛ ˗wo pö, ˈyi mɛn ꞊klaŋ kë ˗së ˈka, ˗an dɔ yi ˗ta. (1 Timote 4:13) ˗A ˗bhɔkwëë bhë, ˗a ˈˈpian ˗totabhaasü ˈö ˗kë Kwa ˗bha ˗kë Kletiɛn ˈka ˗sü ˈka bhë, ˗kɔ ˈyi ˗dho ˈtɔŋ˗ ˗nu ˈwo Biblö ˈgü ˗an ˗ya ꞊bhlëë ˈgü ˗a ˈka yi ˗bha ˗tosɛta ˈgü, ˗ya ˗zɔn yi ˗dhɛ. ˗A ˈˈpian bhë, ˗yö ˗kë dhɛɛˈˈ waa ˗an ˗yɔ ˗nu ˈka. ˗Yö yi ˗takun kö ˈyi Biblö ˈgüman ꞊dedewo.

ˈBha nu yi ˗bha ˗bhɔkwëë ˗nu ˗ta, mɛn draanˈˈ ˗wo ˗nu ˈwo go Biblö ˈgü ˗dho ˈˈyɛ ü zuʋ̈ˈˈ ˗bha.—Isaïe 54:13.

• Yi yi ˗bha ˗bhɔkwëë ˗nu ˗kë ˗kɔ ˗kë ˗dhɛ?

• Yi ˗bha ˗bhɔkwëë ˗mɛɛn ˈü ˈˈpiʋ̈ kö ˈü nu ˗a ˗ta ˗blɛɛsü?