E kaatuuaki te anene, te tataro, ma warekan ao maroroakinan te Baibara n aia bobotaki Kristian rimoa. (1 I-Korinto 14:26) Bon titeboo naba anne ma ae ko kona n noria n ara bobotaki.

E boto man te Baibara te kabwarabwara ao e manena. A bobotaki ekaretia ni kabane n taiani wikeen bwa a na ongoraea te kabwarabwara man te Baibara ae 30 te miniti maanna, ni kaineti ma kiibu aika irekereke ma maiura ao taai aika ti maiu iai. Ti bane ni kaungaaki bwa ti na wareki man ara Baibara, kiibu ake a taekinaki. Imwin te kabwarabwara, iai te Reirei n “Te Taua-n-Tantani” ae maanna teuana te aoa are a butimwaeaki iai ake a roko bwa a na anga aia kaeka n taini maroroakinan te kaongora ibukin te reirei man Te Taua-n-Tantani. Ti buokaki n te maroro aei bwa ti na maiuakin ana tua te Baibara. E reiakinaki ni katobibia te aonnaba te kaongora ae tii teuana n ekaretia aika raka i aon 110, 000 mwaitiia.

E katamaroaaki iai arora n angareirei. Ti bobotaki naba n te tairiki teuana i nukan te wiki ibukin te kaetieti n reirei ae tenua mwakorona ae atuna Maiura ni Kristian ao Ara Mwakuri ni Minita, ae boto i aon Te Boki n Reirei ae Maiura ao Ara Mwakuri ni Minita. Te moani mwakoro boni Baika Kakawaki Aika Mena n Ana Taeka te Atua, ae buokira n taneiai ma mwakoron te Baibara are a a kamani warekia kaain te ekaretia. Imwin anne, Kanakoraoa Am Mwakuri ni Minita ae kanoana kaotioti ibukin aroni maroroakinan te Baibara ma aomata. E ongoraei reirei akanne te tia anga te ibuobuoki ao n anga ana taeka n reirei ibukini kanakoraoan riki arora ni wareware ao n taetaenikawai. (1 Timoteo 4:13) Te kabanea ni mwakoro boni Maiura ni Kristian, ae rinanoaki iai aroni maiuakinan ana boto n reirei te Baibara ni maiura ni katoabong. Iai naba i nanona te maroro ae titiraki ma kaeka ae karikirakea otara n te Baibara.

Ngkana ko irii ara bobotaki, akea te nanououa bwa ane e na anaaki nanom ni bonganan te reirei n te Baibara ae ko reiakinna.—Itaia 54:13.

• Tera ae ko kantaningaia bwa ko na ongoraeia n aia bobotaki Ana Tia Kakoaua Iehova?

• E aera bwa ko aki irii ara bobotaki aikai?