Wanaa sümaa noutkajaain na anoujüshiikana soʼu nükalia Jesuu, eeʼirajüshii, oʼuraajüshii jee ekirajaashii naya sünain tü Ashajuushikat (1 Corinto 14:26). Shiaʼaya neʼe piʼreetka tia puutkajaapa namaa na aküjüliikana pütchi.

Süpülajatü ekirajawaa sünain tü sümakat tü Wiwüliakat. Saawanoʼu jee shiale rimiinkoʼu, outkajaashii na aküjüliikana pütchi süpüla aapajaa wanee pütchi suluʼujeejatü tü Wiwüliakat soʼu apünüin shikii minuuto. Aküjünüsü jamüin sünainpünaaka wakuwaʼipa tü sümakat tü Wiwüliakat otta jamüin shikeraajaka maaʼulu tü sümakat. Aküjünüsü namüin na jutkatakana nachajaainjatüin tü wersiikulo aashajeʼennajatkat. Mapa, ekirajaana anainrü soʼu wanee oora tü rewiisütakat Aapiria Wayuu. Asouktüshii na jutkatakana shiʼipajee tü asakinnakalü anain. Sükaaliinjüin waya sünain oonowaa sümaa tü sümakat tü Wiwüliakat. Wanaawasü tü ekirajaanakalü anain suluʼupünaa 110.000 outkajaalee.

Süpülajatü atüjaa ekirajaa. Outkajaashii nachikuaʼa soʼu semaanaka na aküjüliikana pütchi. Ekirajaashii soʼu apünüin shikii minuuto sünain tü outkajawaakat Ekirajawaa sünain tü Wiwüliakat namaa na Wawalayuukana. Kooʼomüinsü tü natüjaakalü aaʼu süchiki tü sümakat tü Wiwüliakat süka nasouktüin shiʼipajee tü asakinnakalü anain. Mapa, ekirajaana anainrü soʼu apünüin shikii minuuto tü outkajawaakat Ekirajawaa süpüla Aküjaa Pütchi. Shia suʼttaka akajee wanee pütchi naashajeʼeraka paala suluʼujee tü Wiwüliakat na jutkatüshiikana. Mapa, ekirajüshii na ashajirakana nanülia süpüla ekirajawaa jee eeshi wanee wawala akaaliinjakai naya süpüla natüjüin aashajeʼeraa karaloukta otta ekirajaa (1 Timoteo 4:13). Süpüla sujutaain tü outkajawaakat, ekirajaashii waya soʼu apünüin shikii minuuto sünain Outkajawaa süpüla Aʼyatawaa nümüin Maleiwa. Atüjüshii waya ekirajaa süka eein wawalayuu ekirajaka, asakiraka otta eeʼiyataka shiyaawase wanee kasa sünain tia outkajawaakat.

Puutkajaapa, poneerü paaʼin anain maʼin tü ekirajünakalü anain waya (Isaías 54:13).

• ¿Kaseerü piʼraka puutkajaapa namaa na aküjüliikana pütchi?

• ¿Jarat tü outkajawaa puʼuneekalü anain?