Makkaransion, makimallo, mabbibbig anna maggigiammu tu Biblia nu magistudy i ollu ira nga Cristiano. Awan tu anni laman nga ritual nga kuadda. (1 Corinto 14:26) Kunnatun lagapa i kuammi nu magistudy kami.

Nebase-biblia anna praktikal i metuddu ira. Gagangay nga kada Sabadu onu Liggu, magistudy i kada kongregasion tapenu magginna ta 30-minuto nga nebase-Biblia nga palappa meyannung ta nu kunnasi makoffun i Biblia ta pattolay tam anna ta paddia-paddian ta maddaggun. Mapagaram ngaming nga bibbigan i teksto ira ta mismu nga Bibliada. Kabalinna, metunug i tangoras nga Paggigiammu tu Passifusifutan. Puede nga tumabbag i ngaming nga nagatende ta paggigiammu ta artikulo na magigiammu nga edision na Passifusifutan. Moffunan ittam yaw nga paggigiammu tapenu meyaplika i tuddu ira na Biblia. Para-parehu i magigiammu nga artikulo ta maturu nga 110,000 nga kongregasion ta interu davvun.

Matudduan kami nga mapakasta i pangituddumi. Egga paga studymi nga nabillay ta tallu nga parte nga egga temana nga Pattolay Anna Ministerio Tam nga Cristiano, base ta material nga egga ta vinulan nga Pattolay Anna Ministerio nga Workbook ta Study. Moffunakkami na ollu nga parte na miting nga Minas ta Uvovug na Dios tapenu mabbalin tu familiar ta tadday nga parte na Biblia nga dati ngana nabibbig na kongregasion. Tumunug gapa i Mabbalin tu Efektibo ta Ministerio, nga egga ira demonstrasionna nu kunnasi nga ipakanawag i Biblia ta tanakuan. Egga tadday nga gumattabarang nga mangiyawa tu positibo nga komento nga makoffun nikami tapenu mapakasta i pabbibbig anna pakiyuvovugmi. (1 Timoteo 4:13) Ta ultimo nga parte nga Mattolay nga Cristiano, mekonsidera gapa i praktikal ira nga aplikasion na prinsipio ira na Biblia ta inaggaw nga pattolay. Kasali taw i mapaguruvovugan nga pakkiavu-anna-tabbag nga mapponag ta pakalippawa tam ta Biblia.

Nu magatendeka ta studymi, siguradu nga magustuammu i kalidad na edukasion ta Biblia nga magigiammum.—Isaias 54:13.

• Anni i ekspektammu nga maginnam ta study na Saksi ni Jehova?

• Anni nga parte na studymi i ikayamu nga atenderan?