Tá ni̱ si̱ na̱taka na̱ ñani táʼan nduʼu̱ na̱ ni̱ si̱ndoyi tá si̱naʼá, na̱yóʼo ni̱ si̱ xita na yaa nuu̱ Ndio̱s, ta ni̱ si̱ sika̱taʼvi̱ na nuu̱ Ndio̱s, ta si̱ jákuáʼa na ta ni̱ si̱ kaʼvi na Tu̱ʼun Ndio̱s (1 Corintios 14:26). Tá ná kisi ní nuu̱ nátaka nduʼu̱ ña̱yóʼo kúú vá ña̱ kuni ní.

Yóʼo káti̱ʼa nduʼu̱ saʼa̱ Tu̱ʼun Ndio̱s. Tá ndíʼi iin iin semana, ndijaá nduʼu̱ nátaka nduʼu̱ sinajo̱ʼo ndu 30 minuto iin ña̱ káʼa̱n ndojó ná saʼa̱ Tu̱ʼun Ndio̱s. Ta yóʼo nákani na ndixi kuu chindeé Tu̱ʼun Ndio̱s miíyó kivi̱ ndóyi yó viti, saʼa̱ ña̱yóʼo tá káʼvi ta̱ káʼa̱n ndojó iin taʼndá Tu̱ʼun Ndio̱s na̱ ndóyi sinajo̱ʼo yóʼo kánian nandukú ná ña̱ kaʼvi na. Ta tá ndíʼi káʼa̱n ndojó ná ña̱yóʼo, jaá kía̱n iin hora Jákuáʼa nduʼu̱ La Atalaya, yóʼo kúú nuu̱ kuu kaʼa̱n na̱ ndóyi sinajo̱ʼo yóʼo ña̱ ni̱ ku̱ndaa̱ ini na saʼa̱ ña̱ káʼa̱n tutu La Atalaya ña̱ jákuáʼa na semana káa, ña̱yóʼo miía̱n ndaa̱ ndisa chíndeéán nduʼu̱ já kée ndu ña̱ káʼa̱n Tu̱ʼun Ndio̱s. Ta, mií tutu yóʼo kúú vá ña̱ jákuáʼa nduʼu̱, yáʼa ka̱ ciento uxi̱ mil congregación ña̱ ió nuu̱ iníí kúú ñuyíví.

Yóʼo kati̱ʼa va̱ʼa yó ndixi kuu jánaʼa̱ yó saʼa̱ Tu̱ʼun Ndio̱s nuu̱ na̱yivi. Ta jaá ni nátaka nduʼu̱ iin kivi̱ semana já jákuáʼa ndu uni̱ taʼndá, ña̱ míínu̱ú jákuáʼa nduʼu̱ 30 minuto kía̱n tá Nátaka nduʼu̱ Jákuáʼa ndu̱ saʼa̱ Tu̱ʼun Ndio̱s, yóʼo káʼvi na párrafo ta ndákatu̱ʼún ná ndíki̱án ni̱ ku̱ndaa̱ ini na̱ ndóyi sinajo̱ʼo yóʼo, ta ña̱yóʼo chíndeéán nduʼu̱ já kúndaa̱ va̱ʼa ini ndu ley ña̱ va̱si nuu̱ Tu̱ʼun Ndio̱s, ta jaá ní kúndaa̱ ini nduʼu̱ ña̱ si̱ ni̱ kaʼa̱n Tu̱ʼun Ndio̱s ña̱ koo, tá ndíʼi ña̱yóʼo jaá kásáʼá nduʼu̱ jákuáʼa ndu 30 minuto Escuela nuu̱ jákuáʼa nduʼu̱ ndixi kuu Jánaʼa̱ ndu̱ saʼa̱ Tu̱ʼun Ndio̱s, tá kásáʼá ña̱yóʼo já kasáʼá yó káʼa̱n yo̱ saʼa̱ iin taʼndá Tu̱ʼun Ndio̱s ña̱ si̱ ni̱ kaʼvi yó. Já kía̱n na̱ ñani táʼan ndu̱ na̱ si̱ kúu yáʼa káʼa̱n ndojó yáʼa na náʼa̱ na̱ nu̱ú nduʼu̱ ndixi kuu jánaʼa̱ ndu̱ saʼa̱ Tu̱ʼun Ndio̱s nuu̱ na̱yivi, ta iin ñani nduʼu̱ na̱ kuaʼa̱n nuu̱ káʼa̱n ra̱ xíʼín nduʼu̱ ndeé kúú nuu̱ kánian kaʼvi va̱ʼa ndu á kaʼa̱n va̱ʼa ndu já chíndeé rá nduʼu̱ (1 Timoteo 4:13). Ta ña̱ nu̱jandíʼí jákuáʼa nduʼu̱ 30 minuto kía̱n Nuu̱ jákuáʼa nduʼu̱ ndixi kée ndu̱ já Kástu̱ʼun ndu̱ saʼa̱ Tu̱ʼun Ndio̱s, yóʼo yáʼa na̱ káʼa̱n ndojó, ta yáʼa na náʼa̱ na̱, ta jaá ní yáʼa na nákani na ndixi káʼa̱n na̱ xíʼín na̱yivi saʼa̱ Tu̱ʼun Ndio̱s jaá jánaʼa̱ na̱ nu̱ú nduʼu̱ ndixi kee ndu já jánaʼa̱ ndu̱ saʼa̱ Tu̱ʼun Ndio̱s nuu̱ na̱yivi.

Tá ná kisi ní nuu̱ nátaka nduʼu̱, yóʼo kuni ní ndixi ví va̱ʼa jákuáʼa nduʼu̱ saʼa̱ Tu̱ʼun Ndio̱s (Isaías 54:13).

• ¿Ndíki̱án kuni ní tá ná kuʼu̱n ní nuu̱ nátaka na̱ testigo Jeová?

• ¿Ndá kivi̱ kúni̱ ní kisi ní nu̱ú nátaka nduʼu̱ jákuáʼa ndu saʼa̱ Tu̱ʼun Ndio̱s?