Moi na Hkristan zuphpawng ni hta mahkawn hkawn, akyu hpyi, Chyum Laika hti nna hkaja ai lam galaw ma ai. Kaga htunglai ni n nga ai. (1 Korinhtu 14:26) Anhte a zuphpawng ni hpe mung dai zawn sha galaw ai.

Lam matsun ni gaw Chyum Laika hta madung nna tatut hkrak re ai. Hpung ni gaw law malawng laban shani hta zuphpawng hpawng ma ai. Minit 30 na ai mungga hta anhte a prat, anhte asak hkrung nga ai aten hte, Chyum Laika gaw gara hku seng ang ai hpe na lu na. Chyum Laika hpe arau hpaw hti na matu anhte yawng hpe saw shaga ai. Mungga htawn ngut ai hpang minit 60 na ai “Sin Langchyi” Hkaja Hpawng hpe bai galaw ai. Hkaja na Sin Langchyi laika kaw na ga baw langai hpe, arau hti hkaja nna yawng hpe shang lawm na matu saw shaga ai. Dai gaw Chyum Laika a lam matsun ni hpe gara hku hkan sa mai ai hpe sharin ya ai. Mungkan ting hta hpung 110,000 jan gaw dai ga baw langai hpe sha hkaja ma ai.

Sharin achyin ai atsam hpe grau kaja wa hkra karum ya ai. Kaga lani mi hta Anhte A Hkristan Prat Hte Magam Zuphpawng ngu ai, daw masum lawm ai lamang a matu anhte arau hkrum zup ma ai. Hkristan Prat Hte Magam Zuphpawng Shaman Laika Buk hpe madung nna hkaja ai. Shawng nnan gaw, Chyum Laika hpe anhte grau chye na wa hkra karum ya ai Karai A Mungga Kaw Na Sut Gan Ni ngu ai daw re. Hkaja na Chyum daw ni hpe tau hkrau hti da ra ai. Ngut yang, kaga masha ni hte Chyum Laika gara hku bawngban na ngu ai lam hpe madun dan ai Hkaw Tsun Bungli Hta Jailang U ngu ai daw hpe galaw ai. Hpaji daw ai wa gaw, anhte a laika hti ai atsam hte tsun shaga ai atsam ni hpe rawt jat wa hkra sharin ya ai. (1 Timohti 4:13) Jahtum hta gaw, Chyum Laika tara ni hpe prat hta gara hku ta tut hkan sa mai ai lam ni hpe tsun dan ai Hkristan Prat Hkrun Lam ngu ai daw hpe galaw ai. Ndai daw hta Chyum Laika hpe grau nna chye na wa hkra san htai ni galaw nna bawngban ai lam ni lawm ai.

Anhte a zuphpawng de sa lung ai shaloi grai kaja ai Chyum Laika sharin ai lam hpe nang lu la na re.​—⁠Esaia 54:13.

• Yehowa Sakse Ni a zuphpawng ni hta gara lam ni hpe na la lu na kun?

• Anhte a bat shagu galaw ai zuphpawng ni hta na, gara lamang hpe nang lung mayu ai kun?