Maũndũ ala meethĩawa mũno mũno maũmbanonĩ ma Kĩklĩsto ma ĩvinda ya atũmwa maĩ mbathi, mboya, na kũsoma Maandĩko o vamwe na kũmaneenea. Vayeethĩawa na syĩthĩo sya kĩndĩni. (1 Akolintho 14:26) Maũmbano maitũ mekawa o ta ũu.

Momanyĩsyo maumaw’a Mbivilianĩ na nĩmatonya kũtũtethya. Mũthyanĩ wa kĩla kyumwa, kĩla kĩkundi nĩkyũmbanaa kĩthukĩĩsye kwa ndatĩka 30 ũvoo umĩte Mbivilianĩ ĩũlũ wa ũndũ Maandĩko makonanĩtye na mathayũ maitũ ĩvindanĩ yĩĩ. Ithyonthe nĩtwĩkĩawa vinya tũvue Mbivilia sitũ nĩ kana tũatĩanĩe na mumya wa ũvoo ĩla ũkũsoma Maandĩko. Ĩtina wa ũvoo ũsu, nĩvethĩawa na ĩsaa yĩmwe ya Ĩsomo ya “Mũsyaĩĩsya.” Ĩvinda ya ĩsomo yĩu, andũ kĩkundinĩ methĩawa me athokye maumye maelesyo ĩũlũ wa ũvoo ũla ũneenewa kuma ĩkasetinĩ ya kwĩmanyĩsya ya Mũsyaĩĩsya. Ĩsomo yĩu yĩtũtetheeasya kũatĩĩa myolooto ya Mbivilia mathayũnĩ maitũ. Kĩla kĩkundi nthĩnĩ wa ikundi mbee wa 110,000 nthĩ yonthe, kĩmanyĩasya ĩsomo o yĩla yĩkwĩmanyĩw’a nĩ ikundi ila ingĩ.

Nĩtũtetheeaw’a kwĩthĩwa twĩ amanyĩsya aseo. Ĩngĩ, nĩtũmbanaa mũthenya ũngĩ kyumwanĩ. Ũmbano ũsu wĩthĩawa na ilungu itatũ. Tũtũmĩaa kavuku kaseũvaw’a kĩla mwei ketawa Kavuku ka Kwĩmanyĩsya ka Ũmbano. Kĩlungu kya mbee kya ũmbano ũsu kĩla kĩtawa Maũndũ ma Vata Kuma Ndetonĩ ya Ngai nĩkĩtũtetheeasya kũelewa nesanga kĩlungu kĩna kya Mbiviliaandũ methĩawa mambie kũsoma. Kĩla kĩatĩĩaa kyu kĩtawa Ĩkĩa Kĩthito Wĩthĩwe Mũtavany’a Mũseo, nakyo kĩthĩawa na mawonany’o ma ũndũ tũtonya kũneenea Mbivilia na andũ angĩ. Ũla ũkũtaana nũtetheeasya amanyĩw’a asu meke maendeeo nthĩnĩ wa kũsoma na kũneena. (1 Timotheo 4:13) Nakyo kĩlungu kya mũthya kĩtawa Mwĩkalĩle wa Aklĩsto, na nĩkĩneeneeaa ũndũ tũtonya kũtũmĩa myolooto ya Mbivilia kĩla mũthenya. Kĩlungu kĩu no kĩkawa kwa nzĩa ya makũlyo na mosũngĩo, na nĩkĩtũtetheeasya kũelewa Mbivilia mũnango.

Wooka maũmbanonĩ maitũ, vate nzika ũkendeew’a nĩ momanyĩsyo maseo ma Mbivilia ala wĩmanyĩw’a.​—Isaia 54:13.

• Ũtonya kwĩkwatya kwĩw’a maũndũ meva maũmbanonĩ ma Ngũsĩ sya Yeova?

• We wenda kũka ũmbanonĩ wĩva katĩ wa maũmbano maitũ ma kĩla kyumwa?