Ki jingïalang jong ki Khristan ba mynshuwa ki kynthup ïa ki jingrwai, ki jingduwai, ki jingpule bad ki jingïasyllok ïa ka ktien U Blei, khlem kano kano ka jinglehniam. (1 Korinth 14:26) Phin ïohi ba ki jingïalang jong ngi ki ïa syrïem bha bad ka jong ki.

Ki jinghikai katkum ka Baibl bad kiba lah ban bud ha ka jingim. Man ba kut ka taïew, kawei pa kawei ka balang ka ju ïakynduhlang ban sngap ïa ka Jingkren na ka Baibl kaba 30-minit shaphang ba kumno ki jingthoh bakhuid ki don jingïadei bad ka jingim jong ngi, kumjuh ruh bad ki por ba ngi im mynta. La pynshlur ïa baroh ban peit ha la ka jong ka jong ka Baibl. Hadien ka jingkren ka don ka Jingpule na “Ka Kut Ap Phira” kaba shikynta ha kaba ki dkhot ka balang ki lah ban ai jubab na ka Kut Ap Phira (ha ka Phareng). Kane ka jingïasyllok ka ïarap ïa ngi ban bud ïa ki jinghikai jong ka Baibl ha la ka jingim. Baroh ki balang kiba don palat 1,10,000 tylli ha ka pyrthei baroh kawei ki ïa pule ïa kajuh ka bynta.

La ïarap ïa ngi ban kham pynbha ha ki rukom hikai. Ngi ïakynduhlang ruh ha kawei na ki sngi pohïa, por janmiet, na ka bynta lai tylli ki prokram kaba kyrteng Ka Jingim Khristan bad ka Kam Ïalap Jong Ngi, ba la pynshong nongrim ha ki jingthoh ha ka kot Ka Jingim bad ka Kam Ïalap ba Pule ha Jingïalang ba la pynmih man la u bnai. Ka bynta ba nyngkong jong kane ka jingïalang, Ka Spah na ka Ktien U Blei ka ïarap ïa ngi ban sngewthuh bha ïa ki bynta jong ka Baibl kaba ka balang ka la pule lypa. Ka bynta ba ar, Pyndonkam Ïalade ha ka Kam Ïalap ka kynthup ïa ki jingpyni shaphang kumno ban ïasyllok Baibl bad kiwei. Ita iba dei peit ïa kane, i ai jingmut kumno ban kham pyntbit ïa ki rukom pule bad rukom kren jong ngi. (1 Timothi 4:13) Ka bynta ba khatduh, Ka Jingim kum ki Khristan ka peit bniah shaphang ka jingpyndonkam ïa ki aiñ jong ka Baibl ha ka jingim kaba man la ka sngi. Kane ka kynthup ïa ka jingïasyllok lyngba ki jingkylli bad ki jubab kiba kham pynsngewthuh bha ïa ka Baibl.

Haba phi wan sha ki jingïalang jong ngi, khlem artatien phin sa sngewkmen ban ïohi ïa ka rukom hikai Baibl.​—Isaiah 54:13.

• Phi lah ban ïohsngew aïu ha ki jingïalang jong ki Nongsakhi U Jehobah?

• Phi kwah ban wan ha kino na kine ki jingïalang?