Ovakriste vonale ova li hava imbi omaimbilo, hava ilikana nova li hava lesha nokukundafana Omishangwa nopehe na okulandula nandenande eenghulunghedi dopalongelokalunga. (1 Ovakorinto 14:26) Okwoongala kwetu ohaku ningwa monghedi hanga ya faafana naayo yOvakriste vonale.

Ehongo letu ole likolelela kOmbibeli notali tu kwafele monghalamwenyo yakeshe efiku. Exuliloshivike keshe, meongalo keshe ohamu yandjwa Oshipopiwa shopaMbibeli shominute 30, tashi yelifa nghee Omishangwa tadi dulu oku tu kwafela monghalamwenyo yetu nosho yo kombinga yefimbo olo tu li mulo. Ovapwilikini aveshe ohava ladipikwa opo va landule mEembibeli davo. Oshipopiwa osho ohashi landulwa kEkonakono lOshungonangelo, sha hala okutya eenghundafana dopaMbibeli doule wovili imwe, omo oilyo yeongalo hai kala ya manguluka okukufa ombinga. Eenghundafana odo ohadi kala de likolelela kushimwe shomoitukulwa yokukonakonwa oyo hai kala moshifo shokukonakonwa shOshungonangelo nohadi tu kwafele tu tule moilonga omayele Ombibeli monghalamwenyo yetu. Omaongalo etu aeshe mounyuni e dulife po 110 000 ohaa kundafana ouyelele wa faafana.

Ohatu deulwa opo tu xwepopaleke ounghulungu wetu wokuhonga. Ohatu kala yo tu na okwoongala kwopatatu mokati koshivike konguloshi. Okwoongala oko ohaku hovele nEkonakonombibeli lEongalo, olo hali kwata oule wominute 30. Ohali ningwa momukalo weenghundafana domapulo nomanyamukulo odo hadi tu kwafele tu kale tu na eudeko lomoule lomafinamhango opamishangwa nosho yo omaxunganeko Ombibeli. Konima yEkonakonombibeli lEongalo, ohaku landula Ofikola yOkudeula Ovaudifi, oyo hai kwata oule wominute 30. Ofikola oyo ohai hovele neenghundafana de likolelela komatukulwa onhumba Ombibeli oo eongalo la lesha komesho yefimbo. Opo nee taku yandjwa oipopiwa i li pauxupi kwaavo ve lishangifa mofikola. Omukwatelikomesho wofikola oha kala ta tale nghee ovanafikola tave shi endifa opo a dule oku ke va pa omayele va xwepopaleke ounghulungu wavo wokulesha nokupopya. (1 Timoteus 4:13) Konima yofikola oyo, ohaku landula Okwoongala kwoPailonga, oko haku kwata oule wominute 30. Okwoongala oko ohaku kala kwa kwatela mo oipopiwa, omauliko nosho yo omapulapulo, oyo ya nuninwa oku tu kwafela tu dule okuhonga vamwe Ombibeli.

Nopehe na omalimbililo, ngeenge owe uya kokwoongala kwetu, oto ka kala wa kuminwa ehongo lOmbibeli li na ongushu olo hatu mono. — Jesaja 54:13.

• Oshike to ka uda pokwoongala kwEendombwedi daJehova?

• Okwoongala kwetu kwokoshivike kulipi wa hala oku ka kala puko oshikando tashi landula?