We dɛn fɔstɛm Kristian dɛn bin de ol mitin, dɛn bin de siŋ, pre, rid di Baybul, ɛn ɛksplen am. (Fɔs Lɛta Fɔ Kɔrint 14:26) Na di sem tin yu go si na wi mitin dɛn tide.

Wi kin lan tin dɛn we de na di Baybul ɛn dɛn tin ya kin ɛp wi. Ɛvri wikɛnd, ɔl di kɔngrigeshɔn dɛn kin gɛt Pɔblik Tɔk. Wan brɔda kin tɔk bɔt wan tɔpik na di Baybul. I kin du dis fɔ 30 minit. Insay di tɔk, wi kin lan aw di Baybul kin ɛp wi fɔ liv wi layf. Ɛn dis tɔk kin ɛp wi fɔ no wetin di Baybul tɔk bɔt di tɛm we wi de naw. I fayn fɔ lɛ wi ɔl de opin wi Baybul we di brɔda de gi di tɔk. Afta di tɔk, wi kin gɛt di “Wachtawa” Stɔdi we kin de fɔ wan awa. Ɛnibɔdi kin gɛt di chans fɔ tɔk wetin i ɔndastand frɔm Di Wachtawa we wi de stɔdi. Di tin dɛn we wi kin tɔk bɔt kin ɛp wi fɔ du wetin wi de lan na di Baybul. Wi gɛt lɛk 110,000 kɔngrigeshɔn dɛn so na di wɔl ɛn na di sem tin wi kin stɔdi na wi mitin dɛn.

Wi kin lan aw fɔ tich ɔda pipul dɛn. Wan ɔda de insay di wik, wi kin gɛt mitin we gɛt tri pat. Na ivintɛm wi kin gɛt dis mitin. Di mitin nem Wi Kristian Layf ɛn Prichin Wok Mitin. Wi kin pul di tin dɛn we wi kin tɔk bɔt na di mitin na wan buk we kin kam ɛvri mɔnt, we nem Wi Kristian Layf ɛn Prichin Wok Mitin Buk. Di fɔs pat na di mitin nem Di Valyu Tin dɛn Frɔm Gɔd in Wɔd. Dis pat de ɛp wi fɔ no mɔ bɔt di say dɛn na di Baybul we wi kin dɔn rid bifo wi kam. Di nɛks pat na di mitin nem Du Wetin Yu Dɔn Lan we Yu De Prich. Insay dis pat, difrɛn pipul dɛn kin kam na di stej ɛn sho wi aw fɔ yuz di Baybul fɔ tɔk to ɔda pipul dɛn. Di Kristian Layf ɛn Prichin Wok Mitin ovasia kin gi advays dɛn we kin sho wi wetin fɔ du so dat wi go no aw fɔ rid fayn ɛn aw fɔ tɔk fayn to pipul dɛn. (Fɔs Lɛta To Timoti 4:13) Di las pat na di mitin we nem Liv Yu Layf lɛk Kristian kin ɛp wi fɔ fala di Baybul in advays pan ɛnitin we wi de du na layf. Dis pat kin gɛt kwɛstyɔn ɛn ansa dɛn we wi kin tɔk bɔt we de ɛp wi fɔ ɔndastand di Baybul mɔ.

We yu go wi mitin dɛn, yu go lɛk fɔ si di we aw wi de lan di Baybul.—Ayzaya 54:13.

• Wetin yu go lan we yu go wi mitin dɛn?

• Uswan pan wi mitin dɛn yu go lɛk fɔ go?