Pādi papwila bene Kidishitu babajinji, bādi nakampata bemba, balombela, batanga Bisonekwa ne kwisambila’po—pampikwa bisela. (1 Kodinda 14:26) Ye mokamwena ne ku kupwila kwetu.

Bufundiji i bwa mu Bible kadi bwa kamweno. Ku mfulo kwa yenga, kipwilo ne kipwilo kilondanga mwisambo wa mu Bible wa minite 30 ulombola muswelo ukwatañene Bisonekwa na būmi bwetu ne na kitatyi kyotudi’mo. Batwe bonso tulondanga mu Bible wetu patangwa bisonekwa. Shi uno mwisambo ubapu, ke Kifundwa kya “Kiteba kya Mulami” mu nsá umo, kadi bonso batenwe’ko bakokeja kulondolola ku mīsambo ya kishinte kidi mu Kiteba kya Mulami kya kwifunda. Ino mīsambo itukwashanga twingidije misoñanya ya mu Bible mu būmi bwetu. Myanda imo yonka ifundwanga ntanda yonso mu bipwilo 120 000 ne kupita.

Tulumbululanga bwino bwetu bwa kufundija. Kadi difuku dimo kyolwa, mu bukata bwa yenga, tulondanga mpangiko ya bipindi bisatu inena’mba Būmi ne Mwingilo Wetu wa Bwine Kidishitu, idi mu Kabuku ka ku Kupwila Būmi ne Mwingilo kalupuka kweji ne kweji. Kipindi kibajinji kya kuno kupwila, Byabulēme bya mu Kinenwa kya Leza, kitukwasha tuyuke myanda ya mu Bible itangilwe kala na kipwilo. Kipindi kilonda’ko, Wiibidije Mwa Kusapwila, kidi na bya kumwena’ko bya mwa kusapwila bakwetu myanda ya mu Bible. Mudingidi uletanga madingi etukwasha tulumbulule bwino bwetu bwa kutanga ne kufundija. (1 Temote 4:13) Kipindi kya mfulo, Būmi bwa Bene Kidishitu, kilombola muswelo otubwanya kwingidija misoñanya ya mu Bible mu būmi bwetu bwa difuku ne difuku. Mu kino kipindi mudi ne mīsambo ya bipangujo ne malondololo itukwasha twivwanije Bible na mushike.

Pokatanwa ku kupwila, kukabulwepo kwana bufundiji buyampe bwa mu Bible botufundanga.—Isaya 54:13.

• Le i bika byokevwana ku kupwila kwa Batumoni ba Yehova?

• Le i kupwila’ka kumo kotupwilanga yenga ne yenga kosaka kukatanwa’ko?