Ukati waathukumanakaaya makristau oopacera, ayo yaaneepaca, yanlompa, yansoma ni yantaphulela Cowantikhiya Cowaarya. (1 Akorintu 14:26) Nyuuva nnohala uphwanya itthu imocaaru mwarwaaka mmikutthaanoni cihu.

Citthu cinoopeliya mwaha cinkumihiya mbiiblyani ni cinvareliya nteko khula mahuku. Itominku, khula nloko neekristau ninaathukumana wiira wiiweleliye Mwaha waatthu otheene wo minutu 30, unttonkaca manannani Cowantikiya Cowaarya cirinaaya ifayita muukumini wihu ni cinvareliyaaya nteko mahukwaala. Uyo ukatyuuyo khula ntthu naakurumiciya uttharihelela mbiiblyani wawe iversikulu cinsomiyaka. Wamalaka utaphuleliya mwaha waatthu otheene, unaakhala Usomiya wo Irevista Ukhalenla, ummaliha iwoora imoca isomiyaka, ni nopheela pooti ukomentari. Unsomiyaka mwaha mmoca wo irevista Ukhalenla, unnikavihera uvarela nteko ikano combiiblyani. Mwaha mmocaaru yooyo unaasomiya maloko oopwahaka 120.000 arii ituninya yotheene.

Ninaakaviheriya ucuwela inanna yowiitthuciha ratta. Ciicammo ninaakhalanaka nkutthaano iriyari isumana ucoocilo uneehaniya Vida e Ministério Cristãos. Myaha cintafitiya ukati woopankiya nnya mikutthaanonnya cinkumihiya nhina Manual de Atividades ninvahiyeehu khula mweeri. Ula nkutthaanoola uhaana miphantte miraru. Woopacera, uneehaniya Tesouros da Palavra de Deus, unnikavihera ucuwela saana itthu impheelaaya uniitthuciha iversikulu co mbiiblyani cisomaleehu uwaani nihinaaya uwa unkutthaanoni. Mphantte wonayeeli uneehaniya Empenhe-se No Ministério. Ula mphanttyoola anaapankiya mathoonyero annikavihera ucuwela inanna yomaana yoowoopana atthu myaha co mbiiblyani. Namalaka khula nthoonyero, nhooleli o nkutthaano naanihimyera itthu inlamuliyeehu upanka napheelaka usoma saana Ibiiblyani ni ukhala eetthucihi omaana. (1 Timotiyu 4:13) Mphantte woomalela, uneehaniya Viver Como Cristãos, unaanikavihera ucuwela inannani ninlamuliyeehu uvarela nteko mattharelelo ombiiblyani khula nihuku. Ula mphanttyoola anaapankiyaka makoho oopheela waakhuliya annikavihera wiiweeha Ibiiblya.

Nyuuva mwarwaaka mmikutthaanoni cihu, ninawaamini wiira unaahala wuucivelani inanna nnohaleenyu wiitthuca Ibiiblya.—Isaiya 54:13.

• Isiyani nnohaleenyu wiiwa mwarwaaka mmikutthaani co Masaahiti a Yehova?

• Nkutthaanoni ninkhalanakeehu wuucivenleni urwaa?