Ilo iien ko etto, ekkã an kar Kũrjin ro al, jar, riit im bwebwenato ippãn doon kõn Jeje ko. (1 Korint 14:26, UBS) Ãindein wãween amim kweilo̦k ilo raan kein.

Katak ko rej wal̦o̦k rejejjet im rej itok jãn Baibõl̦. Ilo Jãdede ak Jabõt, kajjojo eklejia rej koba ippãn doon im roñjake juon Katak El̦ap jãn Baibõl̦ im 30 minit aetokin. Katak in ej kwal̦o̦k ewi wãween Baibõl̦ emaroñ jipañ kõj im ta ko Baibõl̦ ej ba kõn tõre kein me jej mour ie kiiõ. Eo ej kõm̦m̦ane katak eo ej rõjañ aolep ro me rej kweilo̦k bwe ren kepel̦l̦o̦k Baibõl̦ ko aer ñan eoon ko me rej wal̦o̦k ilo katak eo. Ãlikin wõt katak eo, eklejia eo ej katak ippãn doon ium̦win juon awa kõn bok eo etan “Naan in Keeañ.” Aolep ro ilo eklejia eo rej etale juon iaan katak ko jãn bok in im aolep remaroñ bõk kun̦aaer im uwaak. Katak in kab uwaak ko an ro jet rej jipañ kõj bwe jen maroñ jerbali naan in kakapilõk ko jãn Baibõl̦ eo ilo mour ko ad. Elõñl̦o̦k jãn 110,000 eklejia ko ipel̦aakin lal̦ in rej etale ejja bok in wõt kajjojo wiik.

Kweilo̦k ko rej jipañ kõm bwe en em̦m̦anl̦o̦k wãween am katakin armej ro. Kõmij bareinwõt kweilo̦k ippãn doon ilo juon jota kajjojo wiik ñan kõm̦m̦ane kweilo̦k eo ewõr jilu m̦õttan im kõmij n̦aetan, Jerbal eo Ad im Wãween Ad Mour. Kweilo̦k in ej pedped ioon kein katak eo, Jerbal eo Ad im Wãween Ad Mour, me em̦õj kõm̦m̦ane im letok kajjojo allõñ. Etan m̦õttan eo m̦oktata ilo kweilo̦k in ej Katak ko Raorõk jãn Naanin Anij. M̦õttan in ej jipañ eklejia eo ñan mel̦el̦e kõn kobban eoon ko jãn Baibõl̦ me em̦õj ammim kar riiti m̦oktal̦o̦k. M̦õttan eo tok juon etan Kal̦apl̦o̦k Am̦ Jel̦ã Kwal̦o̦k Naan, ekitibuj waanjoñak ko kõn kilen ammim bwebwenato ippãn ro jet kõn Baibõl̦ eo. Ewõr juon em̦m̦aan ej lale ammim kõm̦m̦ane men in im ej letok naanin kakapilõklõk ko ñan jipañ kõm kakõm̦anm̦anl̦o̦k wãween am riit im kõnono ippãn ro jet. (1 Timote 4:13, UBS) M̦õttan eo ãliktata etan Mourin Kũrjin, ej kwal̦o̦k kõn kilen ammim l̦oore naanin kakapilõklõk ko jãn Baibõl̦ ilo wãween am mour kajjojo raan. Men in ekitibuj kajjitõk im uwaak ko me kõmij etali ippãn doon ñan kam̦wilal̦l̦o̦k ammim mel̦el̦e kõn kobban Baibõl̦.

Ñe kwõj itok ñan iien kweilo̦k ko am, kwõnaaj bwilõñ kõn joñan an em̦m̦an men ko kwõnaaj katak kaki jãn Baibõl̦ eo.​—Aiseia 54:13.

• Kain katak rot ko kokõn̦aan roñjake ilo iien kweilo̦k ko an Ri Kõnnaan ro an Jeova?

• Ewi iaan kweilo̦k kein kokõn̦aan itok im kweilo̦k ippemim?