Awina Klistu wakutalicila ndi walongana ponga kukupepa wimbilanga indwimbo, wapepanga, wawazyanga Amawaliko nu kulanzyanyapo, kutawanga ivya ntambi awe. (1 Wakorinte 14:26) Wonye wo-o avino nasweswenye tukacita.

Vino tukasambilila vikafuma mu Baibolo swinya vikatwavwa. Pa Sabata, mu mawungwe yitu yonsinye tukalongana ku kuteyelezya kwi lyasi ukufuma mu Baibolo ilya mamineti 30 lino likatwavwa ukumanya vino Amawaliko yangatwavwa mu wumi witu pe yo-o impindi yino tufisilepo. Swensinye wakatuwomelezya ukukonkamo mu ma Baibolo yitu pano kalanda wilyasi akuwazya Baibolo. Ilyasi lya Baibolo ndi lyasila, pakakonka Isambililo lya “Ulupungu lwa kwe Kalindilila” lino likasenda iawala lyonga. Wonsinye wano wizile mukulongana wangasukapo mu Ulupungu luno tukusambililamo mwe sabata weyo. Lyo-o isambililo likatwavwa ukulola vino tungawomvya ivisinka vya mu Baibolo mu wumi witu. Ama wungwe yonsinye ukucila 110,000 ukuzinguluka insi yonsinye tukasambilila isambililo ilili lyonganye.

Kukatwavwa ukumanya ivya kusambilizya. Kwawa ukulongana na kunji mukasi ke sabata ukwa mbali zitatu kuno tukakwita ukuti Ukulongana kwa Mikalile nu Mulimo Wuno Tukawomba. Ko-o ukulongana kukawa mu Kalibuku ka Mikalile kano kakafuma cila mwezi. Uluwali lwa kutalicila mwe ko-o ukulongana luno lukakwitwa ukuti, Icuuma Cino Cawa mwi Zwi lya kwe Leza, lukatwavwa ukumanya vino vili mukuwazya Baibolo ukwe cila sabata kuno awa mwi wungwe wakawazizya lyankani ku mang’anda. Uluwali lwaciti wili lukati, Ivya Kucita pa Kuwomba Icete Umulimo wa Kuwizya, mwe lo-o uluwali mukawa ivilanjililo vino vikatwavwa ukumanya ivya kulanzyanya na wantu Baibolo. E katungulula akalola ivisinka vimwi vino vingatwavwa ukuwa swe wakawazya wazima nanti wakalanda wa malyasi awazima. (1 Timoti 4:13) Uluwali lwa kulecelezya ulwa kuti, Vino Awina Klistu Wazipizile Ukuwa lukalanda pe vino tungawomvya ivisinka vya mu Baibolo mu wumi witu uwa cila wanda. Mukawa nu luwali luno lukawa na mawuzyo ni vyasuko vino vikatwavwa ukwivwicisya ivisinka vya mu Baibolo.

Ala ndi mwiza mwalonganako, muliyitopwa ivyewo ivizima ivya mu Baibolo vino mulikunda sana.—Ayizeya 54:13.

• Uzye avyani vino mulisambilila ndi mwiza mwazanwa ku kulongana kwa nte zya kwe Yehova?

• Uzye akulongana ci pe ko-o kuno twalandapo kuno mungakunda ukwiza zanwako?