Kema achtoui Cristo itokilijkauaj monechikouayayaj; uikayayaj, momaijtouayayaj, tlapouayayaj uan kiixtomayayaj toTeotsij iTlajtol (1 Corintios 14:26). Yeka kema timonechikos touaya, tikitas nojkia kej nopa tijchiuaj.

Tlen techmachtiaj kikixtiaj ipan Biblia uan techpaleuia. Sejse chikueyi, nochi timonechikouaj uan tijtlakakiliaj ipan 30 minutos se Tlamachtili tlen kiixtomaj ika Biblia. Nopaya techixtomiliaj kenijkatsa techpaleuia Biblia ipan tonemilis, uan kenijki moaxitijtok ipan ni tonali tlen kiijtoua Biblia. Katli monechikouaj kiniljuiaj ma kitlachilijtiakaj ipan ininBiblia tlen mopojtia. Teipa peua Tlamachtili ika Tlen Tematiltia, ni uejkaua se hora. Kema moixtoma ni tlamachtili nochi uelis tlanankilisej. Nopaya technextiliaj kenijkatsa uelis tijchiuasej ipan tonemilis tlen techtlajtolmaka toTeotsij iTlajtol. Ipan kipano ciento diez mil tlanechikoli katli onka ipan nochi Tlaltipaktli technextiliaj sanse tlamachtili.

Technextiliaj kuali titlamachtisej. Nojkia timonechikouaj seyok tonali. Tlen techmachtiaj ipan nopa tonali moxeloua ika eyi. Ipan tlanechikoli katli itoka Kej Timonejnemiltiaj uan Titlajtolmoyauaj tijtekiuiaj nopa pilamatsi tlen itoka Tlen Tijchiuasej ipan tlanechikoli. Ipan nopa achtoui tlaxeloli katli itoka Tlen tlauel ipati katli Biblia tlamachtia, tijkuamachiliaj textos tlen tijpojkej ipan Biblia. Ipan tlaxeloli katli itoka Kuali ma titlamachtikaj, sekij kinextiaj kenijkatsa titlajtolmoyauaj uan katli kiyakana ni tlanechikoli kiijtoua se keski tlamantli tlen nochi techpaleuia nojua kuali ma titlapouakaj uan kuali ma titlamachtikaj (1 Timoteo 4:13). Teipa ipan tlaxeloli katli itoka Kej timonejnemiltiaj, techmachtiaj kenijkatsa nochipa timonejnemiltisej kej Biblia kiijtoua. Uan kipanoltiaj tlamachtili kampa nochi uelis titlanankilisej uan tlamachtili tlen techpaleuis kuali ma tijkuamachilikaj tlen Biblia tlamachtia.

Kema tias kampa timonechikouaj, tlauel mitspaktis pampa tikitas tlauel kuali tlamachtiaj ika Biblia (Isaías 54:13).

• ¿Tlake tijtlakakilis kampa monechikouaj Jehová itlajtoltemakauaj?

• ¿Ipan tlake tlanechikoli mitspaktiskia tias achtoui?