Yekinika akin kichiuayaj kemej Cristo, keman monechikouayaj mokuikatiayaj, kichiuayaj netataujtil, uan kiixtajtoltiayaj uan momachtiayaj iTajtol Dios (1 Corintios 14:26). Keman tejuatsin tionualas tonechikoluan tikonitas ke no ijkon mochiua.

Motemakaj tamachtilismej tein mokixtiaj itech Biblia uan techpaleuia itech tonemilis. Itamiampa semana, nochin mosentiliaj itech nechikolmej uan kikakij se tanojnots tein kisa itech Biblia tein uejkaua tajko hora. Nejin kinextia keniuj iTajtol Dios kijtoua maj tinemikan uan maj tikajsikamatikan tein mochiujtok itech nejin tonalmej. Kinyoleuaj nochin tein yetokej itech nechikol maj no kiitakan tein kijtoua itech ininBiblia. Satepan mochiua Nemachtil ika amaix Tanejmachtijkej, nejin uejkaua se hora; moita se tamachtilis tein moajsi itech amaix Tanejmachtijkej uan nochin uelij tanankiliaj. Nejin techpaleuia maj tikmatikan keniuj tiktekitiltiskej itech tonemilis tayolmajxitilismej tein moajsij itech iTajtol Dios. Itech sejse nechikol tein moajsij noyampa taltikpak, tein panouaj ciento diez mil, nochin momachtiaj sayoj se taman tamachtilis.

Techpaleuia maj okachi kuali titamachtikan. No timosentiliaj se tiotak itech itajkotian semana uan tikpiaj se nechikol tein ixeyi moxejxeloua. Tein itokay Tonemilis uan toTanojnotsalis, tein mokixtia itech amaix tein kisa mejmetstika Tein timomachtiskej itech nechikol Tonemilis uan toTanojnotsalis. Yekinika taxelol, motokaytia “Tamachtilis tein kipia Biblia”, nejin techpaleuia maj kuali tikixmatikan seki taxelolmej tein kipia Biblia tein ipa achtoya tikixtajtoltijkej. Satepan, itech taxelol “Maj okachi kuali titamachtikan”, mopanoltiaj ixneskayomej tein technextiliaj keniuj uelis titajtoskej ika Biblia iniuan oksekin. Se tokniuj kiita tamachtilismej tein tikpanoltiaj uan techyolmajxitia tein uelis techpaleuis maj okachi kuali titaixtajtoltikan uan maj okachi kuali titajtokan (1 Timoteo 4:13). Uan taxelol “Tonemilis kemej itatojtokakauan Cristo”, tein ika tami nechikol, tikitaj keniuj uelis tikuiskej mojmostaj itech tonemilis tayolmajxitilismej tein kitemaka Biblia. Itech nejin taxelol, tiktemouaj kuali tikajsikamatiskej tein Biblia tamachtia ika netajtanilmej uan tanankililmej.

Keman tionyas tonechikoluan, tikonmoujkaitas nochi tel kuali tamachtilis ika Biblia tein ompa motemaka (Isaías 54:13).

• ¿Toni tataman tamachtilis tikonkakis itech nechikolmej tein kipiaj itaixpantijkauan Jiova?

• ¿Itech katiyejua nechikolmej tein mochiuaj itech sejse semana mitsonpaktiskia tionyas?