Ngoi mɛ ndó awa Kristo ti uzu ndo li abombi tɛ la ko, ala ndo yendó abia, ala ndo vɔrɔndó Nzapa, ndo dindó Ngbangɔ ko ala ndo gbinyangbi nga tɛnɛ na ndoni—ta amisa na asɔnyɔ̃ ndó da ma. (1 Kɔrinto 14:26) Mɔ na hũngɔ ya abombi tɛ e nga bo nga so.

Awangɔ ti abombi ni ndo lo ka ya Ngbangɔ ndo za nga ma wo ma. Lá pɔsɔ bere lá yenga ko, bombi kɔi kɔi ndo má Diskur tɛ azi zu na ya miniti 30 mɛ ndo fa tɛnɛ mɛ Ngbangɔ tɛnɛ mɛ aba du tɛ e nga na ngoi mɛ e da. A ndo sa nguru bɛ e ya zo na zo adi ka ya Ngbangɔ tɛ lo nvɛ̃ni. Na pɛni, hola kɔi ti Mandangɔ “Linɔ́ngi ya Mosɛnzɛli,” zo zu mɛ ka ya bombi alengbi ti gbinyangɔ tɛnɛ mɛ alo bo ka ya bɛli tɛnɛ ti Linɔ́ngi ya Mosɛnzɛli ni. Gbinyangbingɔ tɛnɛ la ndo za e ya e kpã wangɔ ti Ngbangɔ na kwa ka ya du tɛ e. Bo ngi lɛ bɛli tɛnɛ ko kɔi la abombi a ɔ 113 000 ndo manda ge lɛ sese zu.

Ni ndo mai na kɔdɛ tɛ e ti hangɔ na tɛnɛ tɛ Nzapa. Endo e tengbi nga na bi mɛ ndɛ ti ya pɔsɔ na ndɔ ti lingɔ abombi ota. Kɔzoni miniti 30 ti Mandangɔ Ngbangɔ ka ya Bombi, adu mandangɔ ye ti hũnda-na-gbinya ndo za nga e ya egbɔ̃ nda andia na akápa ti Ngbangɔ. Ti sɛ miniti 30 lo ti Kalasi ti kwa ti Teokrasi mɛ ndo banda na gbinyangbingɔ tɛnɛ na ndo agbagbo ti Ngbangɔ mɛ ayata apia adi uzu. So pɛni awa kalasi mɛ asu ili la ka kalasi ni ndo li andulu tɛnɛ. Nyita kɔi ndo hɛ e wangɔ mɛ aza e ya kɔdɛ tɛ e ti dingɔ na Ngbangɔ nga na tɛnɛngɔ tɛnɛ ka gbɛlɛ azi amai. (1 Timɔte 4:13) Ti ndani, miniti 30 lo ti Bombi ti kwa, na lége ti atɛnɛ, fangɔ semɛ kwa ndo du na ni, nga na zo ndo hũnda fɔ̃ lo na ndo, ndo za e ti hĩngangɔ se ti hangɔ azi mɛ ndɛ na Ngbangɔ.

Se mɔ ga bombi tɛ e ko, mɔ na sepalangɔ na se mɛ alɛkɛ na awangɔ ti Ngbangɔ nzɔ̃ni nvɛ̃ni.​—Yisaya 54:13.

• Se mɔ gwe bombi tɛ Atɛmwɛ tɛ Yehova ko ye mɛ mɔ na mangɔ nɛ?

• Bombi mɛ wa la mɔ ye gwengɔ na bi mɛ ga wa?