Ikia yej kitokayaj Cristo kua̱ monechkowa̱yaj takui̱kayaj, kichi̱wayaj oración, kitajto̱ltiayaj wan momachtia̱yaj Itajto̱l Dios (1 Corintios 14:26). Kua̱ téj xaj kan nimonechkowaj, tikitas iga ijko̱nsan nikchi̱waj.

Mopanoltiá tamachtilismej yej moki̱xtiá pan Biblia wan te̱pale̱wiá. Kua̱ tami semana, pan nochi tanechko̱lismej mopanoltiá pan treinta minutos se̱ discurso yej moki̱xtiá pan Biblia, iní̱n te̱nextiliá iga Itajto̱l Dios tajtowa de tejté̱ yej a̱man pano̱toʼ wan te̱nextiliá kén matinemikan. Moijliá yej ompa onokej iga si wel makitajto̱ltikan nochi textos pan Biblia. De ompa pan se̱ hora tikpiáj Tamachtilis de La Atalaya, pan iní̱n moijliá nochi yej monechkojtokej iga welij kimakaj tajto̱lkuepalis pan tamachtilis yej mochi̱wa pan se̱ tema de La Atalaya yej de estudio. Iní̱n te̱nextiliá miak manera ken welij tikchi̱waj ken kijtowa Itajto̱l Dios. Pan ma̱j de ciento diez mil tanechko̱lismej yej onoʼ pan nochi ta̱jli momachtiáj ini̱nsan tamachtilis.

Te̱pale̱wiá iga welij matiye̱ʼtamachtikan. Nimonechkowaj no̱, se̱ biáj pan semana iga nikchi̱waj se̱ tanechko̱lis yej kipiá e̱yi partes. Iní̱n moto̱ka̱wiá Matinemikan wan matitekipano̱kan iga Jehová, iní̱n mochi̱wa ken kine̱xtiá a̱majtajkuilol Guía de actividades para la reunión Vida y Ministerio Cristianos. Yej achto parte moto̱ka̱wiá «Tesoros yej onoʼ pan Biblia», te̱pale̱wiá iga ma̱j matikye̱ʼixmatikan sekin partes de Itajto̱l Dios, wan iní̱n textos niktajto̱ltiáj achto iga manimonechko̱kan. De ompa wi̱ts «Matia̱kan ma̱j ye̱kti tamachtiani», nigaj mopanoltiáj tane̱xtilismej yej te̱pale̱wiá ken matitajto̱kan wan seuʼmej de Itajto̱l Dios. Se̱ toknin kijtowa kén welij ma̱j ye̱kti matiktajto̱ltikan wan matitamachtikan pan Biblia (1 Timoteo 4:13). Pan e̱yi parte de iní̱n tanechko̱lis yej moto̱ka̱wiá «Matinemikan ken Cristo», te̱nextiliá ken welij tinemij nochipa ken kijtowa Itajto̱l Dios. Wan no̱ mochi̱wa tajtanilis wan momaka tajto̱lkuepalis, iní̱n kichi̱wa iga ma̱j matimoye̱ʼmachtikan wan matikye̱ʼojasikan (o mati-ikpaasigan) la Biblia.

Kua̱ xaj kan nimonechkowaj, tikitas iga ompa pux ye̱kti nimomachtiáj Itajto̱l Dios (Isaías 54:13).

• ¿Te̱ tikmatis kua̱ xaj kan monechkowaj yej tajto̱lmoya̱waj de Jehová?

• ¿Katiá de tonechko̱lismej yej nikchi̱waj cada semana tiknekiskiá xaj?