Ałkʼidą́ą́ʼ daʼOodlání áłah nídaadleehgo sin, sodizin, dóó Diyin God Bizaad wóltaʼgo bikʼidiʼdootı̨́ı̨́ł biniyé yaa ahínéiikah ńtʼééʼ. Nihí ałdóʼ áłah nídeidleehígíí tʼahdii tʼááʼákótʼéego ándaʼiilʼįįh.

Diyin God Bizaad biiʼdóó dóó iinánígi áká análwoʼgo bee naʼnitin. Damóo yázhí doodaiiʼ damóogoda, Diyin God Bizaad baa haneʼígíí tádiin dah alzhinjįʼ nihił náháni. Éí díí haitʼéego niheʼiinaʼ dóó kʼad nihił hoogááł bídadéétʼiʼígíí nihił ííshjání ánálʼįįh. Nihił halneʼígíí Diyin God Bizaad yółtaʼgo nihí ałdóʼ bił daníilʼı̨́įgo nizhóní doo. Áádóó díí Diyin God Bizaad baa hóóneʼ bikéédóó tʼáá łáʼí ahééʼílkidjįʼ “Bee Haʼídéesʼı̨́įʼii” Bíhooʼaah ánálʼįįh. Díí tʼáá háiida atah baa yáshtiʼ doo nízinígíí bá hazʼą́. Bee Haʼídéesʼı̨́įʼii biiʼdę́ę́ʼ baa yátiʼgo Diyin God Bizaad bikʼehgo oodááł bikʼeh ániitʼé doogi yee nihíká análwoʼ. Nahasdzáán bikááʼ tʼáá náhwiistʼą́ą́ ńtʼééʼ 110,000 dóó baʼaan áłah nídaʼadleehgóó bídahwiilʼaahígíí tʼáá ałtso ahedaałtʼé.

Hazhóʼó nidaʼniitin dooígi nihíká anáʼáwoʼ. Tʼááłáhádi damóo náʼodleełgo hiiłchʼįįhgo táaʼgo ałkééʼ nínilgo ałdóʼ biniyé áłah nídeidleeh. Éí kóolyéh, Jesus Bedaʼiilʼı̨́įgo Dahiniiʼná dóó Nidaʼniitin ánídeilʼįįh. Éí biiʼ Naaltsoos Bee Íhooʼaahígíí wolyéhígíí, tʼáá náhidizííd bikʼeh hahinidééhígíí ánídeilʼįįh. Díí áłah aleehgi áłtséhígíí éí Diyin Bizaad Binaʼnitin, éí God Bizaad łaʼ tʼáá íídą́ą́ʼ biiʼdóó dawóoltaʼígíí hazhóʼó béédahodiilzįįł biniyé. Áádóó, Díí Binahjįʼ Hazhóʼó Naʼnítin Doo, éí Diyin Bizaad háiida bił baa náhódóotʼįįłígíí hanááł ádaalneʼ. Naʼnitin yá sizínígíí hanihisíidgo ííníiltaʼígi dóó yéeltiʼígi hazhóʼó íilʼı̨́į doo biniyé yee nihíká análwoʼ. (1 Timothy 4:13) Jesus Bedaʼiilʼı̨́įgo Dahiniiʼná éí haitʼéego tʼáá ákwíí jı̨́ Diyin kʼehgo dahiniiʼnáa doogi nihíká análwoʼ. Díí éí Diyin Bizaad hazhóʼó bikʼiʼdidootı̨́ı̨́ł biniyé naʼídíkid dóó baa náhátʼı̨́.

Áłah nídeidleehgi nihaa yííníyáago, Diyin God Bizaad yáʼátʼéehgo baa íhoołʼaahígíí nił nizhónígo baa nitsíníkees doo.​—Isaiah 54:13.

• Jiihóvah Yá Dahalneʼé áłah nídaadleehgi haʼátʼíísh bíndaʼniltinígíí didíítsʼı̨́ı̨́ł?

• Háiidígííshąʼ áłah náánéiidleehígíí díínááł nínízin?