Pa ngomano sya baKrisitu babwandilo bimbagha inyimbo, biputagha, babelengagha iBaibolo nuyobesania amalemba. (1 Bakorinti 14:26) Nanuswe pangomano syitu momuno tubombela.

Isi tumanyila sikufuma m’Baibolo. Sabata aliwesa tubungana ukuti tumanyile pampene “Inkhani ya m’Baibolo” iya maminiti 30. Inkhani iyi yikututula umanya muno ifundo sya m’Baibolo situtulila umanya akabalilo aka tulimo. Linga tubelenga iBaibolo aliwesa akwighula mu Baibolo lyake. Linga tumalile umanyila inkhani ya m’Baibolo tumanyila kangi “Gongwe la Mulinda” kwa 1 awala. Aliwesa akuya mwabuke ukwamulapo pakabalilo aka. Akabalilo aka, tumanyila muno tubaghile ukongela ifundo sya m’Baibolo pa bumi bwitu. Ifi tumanyila, fifwene na ifi abakamu bitu bomanyila pa kisu kyosa mufipanga fyakukinda 115,000.

Tumanyila muno tubaghile ukumanyikisya abangi. Nkati mwa sabata tubungana kangi ukuti tumanyile. Pakabalilo aka tumanyila ifiyabo fitatu. Ukufumusya nu Bumi Bwitu Bwabukrisitu, gho mutu wa fimanyilo ifi. Imbatiko ya nkhani isi tumanyila umwesi ghulighosa sikwaghiwa mu Ukufumusya nu Bumi Bwitu-Imbatiko yangomano syitu. Mu kiyabo kyakwanda, Ikyuma Iki Kikwaghiwa M’masyu Gha Kyala, kitutula upilikisya ikiyabo kya m’Baibolo iki twapeliwe ukuti tubelenge. Mu kiyabo kyabubili kya Muno Tubaghile Ukufumukisya, tumanyila muno tubaghile ubamanyikisya abangi amasyu gha Kyala. Uyu olongosya pakabalilo aka, otutula ukuti tumanye muno tubaghile ukubelengela kanunu nukuyoba kanunu na bandu linga tumanyila nabo iBaibolo. (1 Timoti 4:13) Mu kiyabo kya bumalilo, Ubumi Bwitu Bwabukrisitu, tumanyila muno tubaghile ukongela ifundo sya m’Baibolo pabumi bwitu. Pakabalilo aka tumanyila kangi inkhani iyi yikuya namalalusyo. Inkhani iyi yikututula ukuti tupilikisye kanunu ifundo sya m’Baibolo.

Tuli nulusubilo ukuti mukwisa pohoboka namuno tumanyilila iBaibolo linga mwisile pangomano syitu.—Yesaya 54:13.

• Ngimba findu fiki ifi mukwisa popilika linga mwisile pangomano sya Baketi ba Yehova?

• Ngimba umwe mulonda ukuti musayepo palukomano luliku?