Фицаг ӕноси киристӕнттӕ ӕмбурди Хуцаумӕ кувтонцӕ, кади зартӕ ин кодтонцӕ, удта Финстадӕ кастӕнцӕ ӕма ибӕл дзубанди кодтонцӕ (1 Коринфӕгтӕмӕ 14:26). Мах дӕр абони не ’мбурдтӕ уӕхӕн ӕгъдаумӕ гӕсгӕ фӕууадзӕн.

Ахур си кӕнӕн Библи ӕма нин е хӕссуй пайда. Сабати кенӕ хуцаубони нин фӕууй дууӕ хаййемӕй конд ӕмбурд. Фиццаг 30 минутти бал байгъосӕн Библибӕл арӕзт радзубандимӕ. Дзурд си фӕццӕуй, Библи нин нӕ царди куд ӕнхус кӕнуй ӕма си мах рӕстӕги туххӕй ци финст ес, уобӕл. Радзубанди кӕмӕн фӕууй, е Библийӕй стихтӕ ку фӕккӕсуй, уӕд алкедӕр еци стихтӕ ӕхе Библий иссеруй. Уой фӕсте еу сахат фӕццӕуй «Гъӕуайгӕнӕн мӕсуги» ахур ӕма си ӕрмӕг февзарӕн фарстатӕ ӕма дзуӕппити фӕрци. Ӕрмӕг еумӕ ку февзарӕн, уӕд алкӕмӕн дӕр ӕ бон фӕууй ӕ гъуди зӕгъун ӕма уой фӕрци хуӕздӕр балӕдӕрӕн, Библий унаффитӕй царди куд ес пайда кӕнӕн, уой. Ӕнӕгъӕнӕ дуйнебӕл дӕр ес 110 000 ӕмбурдемӕй фулдӕр ӕма си алкӕцими дӕр фӕййахур кӕнунцӕ еци еу ӕрмӕг.

Ахур кӕнӕн адӕмӕн Хуцауи Дзурд хуӕздӕр амонун. Къуӕрей медӕг ма нин еу изӕр фӕууй ӕртӕ хаййемӕй конд ӕмбурд, Нӕ киристон цард ӕма лӕггада. Еци ӕмбурд арӕзт ӕй, алли мӕйӕ дӕр ка рацӕуй, еци программӕбӕл „Нӕ киристон цард ӕма лӕггадӕ. Косӕн тъетрад“. Фиццаг хай хуннуй „Хуцауи Дзурди хӕзнатӕ“. Еци хаййи арфдӕр рартасӕн, ӕмбурд Библийӕй рагацау ке бакӕсуй, еци скъуддзаг. Дуккаг хай хуннуй „Арӕхстгундӕрӕй игъосун кӕнӕ“. Еци хаййи фӕууй равдиститӕ, адӕни хӕццӕ нӕ бон куд ӕй Библий туххӕй арӕхстгундӕрӕй дзорун, уой фӕдбӕл. Ӕмбурд ка фӕууадзуй, еци ӕнсувӕр лӕмбунӕг фӕккӕсуй, Библий скъуддзаг ка фӕккӕсуй ӕма равдистити ка фӕййархайуй, уонӕмӕ. Уой фӕсте син фӕззӕгъуй, сӕ бон фӕххуӕздӕр кӕнун ци адтайдӕ, уой (1 Тимофеймӕ 4:13). Фӕстаг хай ба хуннуй „Нӕ киристон цард“. Уоми дзурд фӕццӕуй, Библий унӕффитӕй нӕ бон куд ӕй нӕ царди пайда кӕнун, уой туххӕй. Дзубанди фӕццӕуй фарстатӕ ӕма дзуӕппити фӕрци. Уотемӕй Библий арф гъудитӕ хуӕздӕр балӕдӕрӕн.

Не ’мбурдти Библийӕй ци базонӕн ӕма цӕбӕл исахур уӕн, уой нецӕй хӕццӕ ес рабарӕн. Уой дӕхуӕдӕг фӕййиндзӕнӕ, не ’мбурдтӕй ескӕцимӕ ку ӕрбацӕуай, уӕд (Исай 54:13).

• Йегови Ӕвдесӕнти ӕмбурдтӕ куд фӕццӕунцӕ?

• Алли къуӕре дӕр нин ци фембӕлдтӕ фӕууй, уонӕй дӕ кӕцимӕ фӕндуй ӕрбацӕун?