De ieeschte Christen deeden bie äare Toopkomes biejlikj sinjen, bäden, de Schreft läsen un doaräwa räden (1. Korinta 14:26). Ernoa soo es daut bie onse Toopkomes vondoag dän Dach uk.

Doa kjrie wie gooden Rot ut de Schreft. Utgangs Wäakj haft jieda Vesaumlunk eene biblische Räd, waut 30 Minuten dieet. Doa woat utjelajcht, woo wieetvoll de Schreft fa onse Tiet es un waut wie doavon lieren kjennen. Jieda eena kaun de Bibelvarzh en siene ieejne Bibel metläsen. No daut kjemt daut Wachtturm-Studium. Daut dieet eene Stund, un jieda eena kaun doa metmoaken, wan een Artikjel vom Wachtturm (Utgow fa daut Studium) derchjenomen woat. Dit halpt ons to vestonen, woo wie no de Schreft läwen kjennen. En mea aus 115 000 Vesaumlungen oppe gaunze Welt woat dautselwje studieet.

Doa lia wie, woo wie aundre bäta lieren kjennen. Eenen Zeowes enne Wäakj hab wie noch een aundret Toopkomen, waut dree Poat haft. Daut es de School fa ons christeljet Läwen un Deenst. Waut doa derchjegonen woat, es en daut Schoolheft fa Läwen un Deenst, waut jieda Moonat rutkjemt. Daut ieeschte Poat von de School es “Schaza ut Gott sien Wuat”; doa lia wie mea äwa eent ooda miere Kapitels von de Schreft, waut wie aul em verut jeläst haben. No daut woat en daut Poat “Em Deenst bäta woaren” jewäsen, woo wie met aundre von de Schreft räden kjennen. Doa woat uk Rot jejäft, woo wie bätre Läsa un Rädna woaren kjennen (1. Timotäus 4:13). Tolatst kjemt noch daut Poat “Ons christeljet Läwen”, waut sikj doavon haundelt, woo wie jieda Dach no de Schreft läwen kjennen. Daut wie de Schreft noch bäta vestonen kjennen, woaren doa uk Froagen jestalt, wua jieda eena auntwuaten kaun.

Wan du no onse Toopkomes kjemst, woat die daut secha oppfaulen, waut eena doa nich aules ut de Schreft lieet (Jesaja 54:13).

• Waut kaun eena bie Jehova siene Zeijen äare Toopkomes lieren?

• Bie woont von onse Toopkomes wurscht du mol jleichen to sennen?