Pomwe akhrisitu woyambirira angasonkhana, iwo angaimba nyimbo, kupemphera, kupfunzira Malemba ndipo pangachitikalini miyambo yaliyose. (1 Akorinto 14:26) Imwepo mukadzabwera kumisonkhano yathu, mudzawone volingana na mwevi.

Tichapfunzira mpfundo zochokera m’Baibolo zomwe zichatithandiza ntsiku iliyose. Mpingu uliwose uchasonkhana kumapeto kwa sondo kuti ubvesere nkhani ya m’Baibolo ya 30 minutu, yomwe ichafotokoza momwe Malemba Yopatulika yaliri yakudikana pamoyo wathu na momwe tingayaphatisire basa munthawe yomwe tinkukhala. Tose tichalimbikisiwa kumbalewengambo malemba m’Baibolo. Ikandopera nkhani ya m’Baibolo, tichayambiratu pfunziro ya ‘Nsanja ya Olonda’ ya wani awa. Pfunziro ya Nsanja ya Olonda ichatithandiza kuphatisira basa mpfundo za m’Baibolo pamoyo wathu. Ndipo nkhani ibodzi-bodzi ichapfunziriwa padziko yose m’mipingu yopitirira 110.000.

Ichatithandiza kuti tikulise buya yathu yopfunzisa. Tichaungana soti nkati mwa sondo kuti tichite nsonkhano wa mbali zitatu zomwe ni Utumiki na moyo wathu wachikhrisitu, yomwe ni pologalama ya mwezi uliwose yochokera mu Utumiki na moyo wathu wachikhrisitu. Mbali yoyamba ya nsonkhano moyu ni Chuma chogumanika m’mawu ya Mulungu, yomwe ichatithandiza kuti tibvese bwino mpfundo za m’Baibolo zomwe abale na alongo azikonzekera m’mamiyi mwawo. Mbali yachiwiri ichachemerewa kuti Kupfunzisa mwabuya mu umboni. Mu mbali mweyi muchachitiwa vitsanzo va momwe tingachezere na wanthu va Baibolo. Patsogolo pake, mulangizi achafotokoza vatingachite kuti timbalewenge na kupfunzisa mwabuya. (1 Timoteyo 4:13) Mbali yomalizira ni Moyo wathu wachikhrisitu, yomwe ichatithandiza momwe tingatewedzerere mpfundo za m’Baibolo ntsiku na ntsiku. Mbali mweyi ichakhala na kukambirana pophatisa basa mibvunzo na midawiro yomwe ichayingizira chidziwiso chathu cha m’Baibolo.

Tinashuwa kuti imwepo mukadzayenda kumisonkhano yathu, mudzakomedzewe maninge na chipfunziso cha m’Baibolo. —Yesaya 54:13.

• Ko mungadikhire kudzabva chani kumisonkhano ya Mboni za Yahova?

• Ko ni iponi ya misonkhano yomwe muchada kudzagumanikako?