E raveia ana te au imene, au pure, tatauanga e te uriurianga i te au Tuatua Tapu i roto i te au uipaanga Kerititiano i mua ana, kare tetai atu au tu peu e o mai ana. (1 Korinetia 14:26) Ka kite katoa koe i te reira i ko i ta matou au uipaanga i teia tuatau.

E raveia ana te au apiianga tau i roto i te Pipiria. I te au openga epetoma, e uipa ana te au putuputuanga i te akarongo ki tetai akoanga Pipiria e 30 miniti no runga i ta te au Tuatua Tapu e akakite maira no runga i to tatou oraanga e te tuatau e noo nei tatou. E akamaroiroiia ana matou katoatoa kia akara ki roto i ta matou uaorai Pipiria. Muri ake i te akoanga, ka raveia te “Apii Punanga Tiaki” e tai ora, e e arikiia ana te au mema o te putuputuanga kia piri mai ki te uriurianga o tetai atikara mei te tuanga apii o Te Punanga Tiaki. E tauturu mai ana teia uriurianga ia matou kia taangaanga i te au aratakianga a te Pipiria i roto i to matou oraanga. E apiiia ana taua atikara rai i roto i te 110,000 au putuputuanga i te ao katoa.

E tauturuia ana matou kia akameitaki atu i to matou tu karape. E uipa katoa ana matou i tetai aiai i te epetoma no tetai uipaanga e toru tuanga tei kapikiia, Oraanga Kerititiano e te Angaanga Orometua, akatumuia ki runga i te apii i roto i ta tatou Puka Angaanga no te Uipaanga Oraanga Kerititiano e te Angaanga Orometua i te au marama. Te tuanga mua, Au Mea Umere i Roto i te Pipiria, ei akamatau ia tatou ki te tuanga o te Pipiria, ka anoanoia te putuputuanga kia tatau na mua ake. Aru mai, Rave Maroiroi te Angaanga Orometua, kapiti mai te au akatutuanga akapeea me uriuri i te Pipiria ki tetai ke. Te taeake nana teia tuanga, ka oronga mai aia i tetai au manako ei tauturu ia tatou i te akameitaki atu i to tatou tu karape i te tatau e te tuatua. (1 Timoteo 4:13) Tuanga openga, Oraanga Kerititiano, ka akamanako eaa te mataara tau no te taangaanga i te au kaveinga Pipiria i te au rā. E uriurianga teia, kapiti mai i te uianga e te pauanga te ka akamaata atu i to tatou mārama no runga i te Pipiria.

Me tae mai koe ki ta matou au uipaanga, ka mataora koe i te au tu meitaki o te apiianga Pipiria te ka rauka mai ia koe.—Isaia 54:13.

• Eaa taau ka tapapa atu i te akarongo i te au uipaanga a te Au Kite o Iehova?

• Ko teea uipaanga o te epetoma taau ka inangaro kia tae mai?