Umi xibbi diro Kiristaanu mitteenni gamba yaanno woyite faarso faarsiˈranno, huuccatto assiˈranno, hattono Qullaawa Borro nabbawe hasaawanno; kayinni wole wonshanno woga dino. (1 Qorontoosi 14:26) Ninke gambooshshino hattooha ikkinota huwatatto.

Rosiinsanni rosi Qullaawu Maxaafi giddo nooho, hattono kaaˈlannoho. Mitte mittenti songo Qidaame woy Sambata 30 daqiiqita Qullaawu Maxaafi lallawo macciishshate gamba yitanno; tini lallawo Qullaawa Borro heeshshonkera kaaˈlitannohu hiittoonniitironna yannanke ledo mayi xaadooshshe afidhinoro xawissanno. Hakkawoyite baalunku uminkeha Qullaawa Maxaafa faˈnine harunsineemmo. Lallawote gedensaanni, songote giddo noo roduuwi baalunku hedonsa coyidhanno faro afidhannoti “Agarooshshu Shae” Xiinxallo heedhanno; tenne xiinxallo yannara Agarooshshu Shae yinanni borro horoonsiˈne mitte saate hasaambeemmo. Kuni hasaawi Qullaawu Maxaafi amaale garinni heeˈneemmo gede kaaˈlannonke. Alamete doyichora noote 110,000 saˈanno songuwa baalante giddo mittu gari borro xiinxallineemmo.

Rosiisate dandoonke lossiˈrate kaaˈlannonke qajeelsha afiˈneemmo. Qoleno lamalate mereero mitto barra, sase gafa afiˈrinohu Kiristaanu Heeshshonna Soqqansho yinanni gambooshshi noonke; kuni gambooshshi xintaminohu aganu kiiro qixxaabbannote Kiristaanu Heeshshonna Soqqansho—Xiinxallote Maxaaficho yinanni borro aanaati. Maganu Qaali Giddo Noo Jiro yinanniti gambooshshunniti umi kifile, songo balaxxe nabbabbinoha Qullaawu Maxaafi gafa seekkite huwattanno gede kaaˈlitannote. Hakkiinni Qanchu Soqqanshora Diinaggaabbe yitanno kifilera, Qullaawa Maxaafa mannu ledo hasaawa dandiinanni gara leellishshannoti addi addi ikkito shiqqanno. Amaalanno rodii nabbawatenna coyiˈrate dandoonke woyyeessiˈrate kaaˈlitanno hedo kulannonke. (1 Ximootewoosi 4:13) Kiristaanu Heeshshora yinannite jeefote kifilera, heeshshonke giddo Qullaawu Maxaafiha xintu seera harunsa dandiineemmo gara ronseemmo. Tenne kifile giddo mittu, xaˈmotenninna dawarotenni shiqanno hasaawaati; kuni hasaawi Qullaawu Maxaafi egennonke lexxitanno gede kaaˈlannoho.

Gambooshshenke dayittoro, hakko rosiinsanniha isilancho Qullaawu Maxaafi roso lowonta dhaggeeffatattota dihuluullammeemmo.—Isayyaasi 54:13.

• Yihowa Farciˈraasine gambooshshiwa maa maa macciishshatto?

• Lamalate gambooshshinke giddo hiikkonne laˈˈa hasiˈratto?