I асырда яшан месихчилер йыгнак душушыкларында айдым айдярдылар, Худая дога эдйәрдилер ве Мукаддес Язгылары окап, оларың эсасында пикир алышярдылар (1 Коринтослылар 14:26, 27). Бизиң йыгнак душушыкларымыз хем шейле гөрнүшде гечирилйәр.

Мукаддес Язгыларың эсасында билим берилйәр. Дынч гүнлери әхли йыгнакларда 30 минутың довамында Мукаддес Язгылара эсасланан нутук билен чыкыш эдилйәр. Онда бизиң дурмушымыз ве яшаян дөврүмиз билен Мукаддес Язгыларың нәхили багланышыгының бардыгы дүшүндирилйәр. Биз нутукда окалян аятларың әхлисини Мукаддес Язгыларымыздан ызарлаярыс. Соңра бир сагадың довамында «Гаравул диңини» өвренмек душушыгы гечирилйәр. Бу душушыкда «Гаравул диңи» журналындан бир макала өвренилйәр ве душушыга геленлериң әхлиси сораглара җогап берип билйәрлер. Шейле гүррүңдешлик бизе Мукаддес Язгыларың маслахатларыны дурмушымызда уланмага көмек эдйәр. Бүтин дүнйәде 110 мүңден говрак йыгнакларың әхлисинде бирмеңзеш тема өвренилйәр.

Мугаллымчылык укыбыңы өсдүрмәге көмек эдйәр. Хепдәниң башга гүнлери болса, үч бөлүмден ыбарат болан йыгнак душушыгы гечирилйәр. Онуң биринҗи бөлүми — Мукаддес Язгылары өвренмек душушыгы. Ол 30 минут довам эдйәр. Бу душушык бизе Мукаддес Язгыларың принциплерине ве пыгамберликлере чуңңур дүшүнмәге ярдам эдйәр. Соңра Вагыз мекдеби душушыгы башланяр. Ол хем 30 минут довам эдйәр. Онуң биринҗи ярымында Мукаддес Язгылардан шол хепдеде окалмалы аятларың эсасында пикир алшыляр. Шейле-де Мекдебе языланлар гысгаҗык юмушлар билен чыкыш эдйәрлер. Бу душушыгы гечирйән доган чыкыш эдйәнлери үнсли диңләп, олара окамак ве геплемек укыпларыны өсдүрмәге көмек эдйәр (1 Тимотеос 4:13). Йыгнак душушыгының иң соңкы бөлүминде 30 минутлык Гуллук душушыгы гечирилйәр. Йыгнакдакы чыкышлар, нутуклар ве гечирилйән сөхбетдешликлер диңлейҗилере Мукаддес Язгылардакы хакыкаты башга адамлара гүррүң бермәге көмек эдйәр.

Бизиң йыгнак душушыкларымызда Мукаддес Язгылара эсасланан пейдалы билим берилйәр. Эгер сиз олара гатнашсаңыз, мунуң шейледигине гөз етирерсиңиз (Ишая 54:13).

• Ехованың Шаятларының йыгнак душушыклары нәдип гечирилйәр?

• Сиз хер хепдеде гечирилйән йыгнак душушыкларымызың хайсысына гатнашмак ислейәрсиңиз?