Ko nā hauniga a nā Kelihiano muamua nae aofia ai nā pehe, tatalo ma te faitau ma talanoa ki nā Tuhituhiga Paia​—e haoloto mai nā faiga lotu. (1 Kolinito 14:26) E kē fakatalitalia ni mea e tutuha vēnā i a matou hauniga.

Ko nā fakatonuga e fakavae i te Tuhi Paia ma e matuā aogā. I te fakaikuga o te vaiaho, ko nā fakapotopotoga takitahi e feiloaki ke fakalogo ki he lauga fakate-Tuhi Paia e 30 minute e uiga ki te auala e fakatuha ai nā Tuhituhiga Paia ki o matou olaga ma nā taimi kua ola ai ki tatou. E fakamalohi ki matou uma ke faitau fakatahi a matou Tuhi Paia. Ka uma te lauga, e fakafano he itula ke Hukehuke ai te “Watchtower,” e tatala atu ki nā tino uma o te fakapotopotoga ke fai he latou vaega i te talanoaga o te matakupu mai te lomiga hukehuke o The Watchtower. Ko te talanoaga tēnei e fehoahoani ki te ki tatou ke fakatino nā takitakiga kua kaumai e te Tuhi Paia ki o tatou olaga. Ko te matakupu lava tēnei e hukehuke fakatahi e nā fakapotopotoga takitahi e hili i te 110,000 i te lalolagi kātoa.

Kua fehoahoani ki matou ke fakaleleia tō matou iloa akoako. E feiloaki fakatahi foki ki matou i he afiafi i lototonu o te vaiaho mo he polokalame e tolu nā vaega. Te vaega muamua e 30 minute te Hukehukega Fakate-Tuhi Paia a te Fakapotopotoga, he talanoaga e fai nā fehili ma nā tali e fakaloloto ai tō tatou malamalama ki nā matakupu hilihili mai nā Tuhituhiga Paia ma nā valoaga fakate-Tuhi Paia. E hohoko mai, te vaega e 30 minute ko te Ākoga mo nā Tino Talaki e kamata i he talanoaga o he vaega o te Tuhi Paia kua uma te faitau e te fakapotopotoga. Ko nā tino ākoga kua tuhia o latou igoa i te ākoga e fai ni a latou lauga pukupuku. E kavatu e he faiākoga ni fautuaga ke fehoahoani ke fakaleleia te matou poto faitau ma te talanoa. (1 Timoteo 4:​13) Mulimuli ake, i te 30 minute ko te Hauniga o te Kaukaunaga, e ala i ni lauga, taulimaga, ma ni fakatalanoaga, e akoako ai ki matou i te auala e akoako ai iē tahi i te Tuhi Paia.

Kāfai koe e fano ki a matou hauniga, e mautinoa ka fiafia koe ki nā akoakoga lelei a te Tuhi Paia e maua mai ai e koe.​—Ihaia 54:13.

• Ko he ā e fakatalitalia e fakalogo ai koe i nā hauniga a Molimau a Ieova?

• Ko te ā te matou hauniga e hohoko mai e fiafia koe ke fakatahi ki ei?