Ko e mu‘aki ngaahi fakataha faka-Kalisitiané na‘e kau ki ai ‘a e ngaahi hiva, ngaahi lotu, pea lau mo fetalanoa‘aki ‘i he Folofolá​—‘o ‘atā faka‘aufuli mei ha fa‘ahinga ouau pē. (1 Kolinitō 14:26) ‘E lava ke ke ‘amanekina ‘a e me‘a mātu‘aki meimei tatau ‘i he‘emau ngaahi fakatahá.

Ko e fakahinohinó ‘oku makatu‘unga ia ‘i he Tohi Tapú pea ‘oku ‘aonga. ‘I he faka‘osinga ‘o e uiké, ‘oku fakataha ai ‘a e fakataha‘anga taki taha ke fanongo ki ha malanga Fakatohitapu miniti ‘e 30 ki he anga ‘o e fakamatala ‘a e Folofolá ki he‘emau mo‘uí pea ki he taimi ‘oku mau mo‘ui aí. Ko kimautolu kotoa ‘oku fakalototo‘a‘i ke mau muimui ki ai ‘i he‘emau Tohi Tapú tonu. Hili ‘a e malangá, ‘oku ‘i ai ha Ako “Taua Le‘o” houa ‘e taha, ‘a ia ‘oku talitali lelei ai ‘a e kau fanongó ke nau kau ‘i ha fetalanoa‘aki ‘o ha kupu mei he pulusinga ako ‘o e Taua Le‘o. Ko e fetalanoa‘aki ko ení ‘oku tokoni‘i ai kimautolu ke mau ngāue‘aki ‘a e tataki ‘a e Tohi Tapú ‘i he‘emau mo‘uí. ‘Oku ako ‘a e fakamatala tatau ‘i he‘emau fakataha‘anga taki taha kotoa pē ‘e 110,000 tupu ‘i māmani lahi.

‘Oku tokoni‘i ai kimautolu ke fakalelei‘i ‘emau pōto‘i fakafaiakó. ‘Oku mau toe fakatahataha fakataha foki ‘i ha efiafi he lolotonga ‘o e uiké ki ha polokalama konga ‘e tolu ‘oku fakakaveinga Ko ‘Etau Mo‘ui Faka-Kalisitiané mo e Ngāue Fakafaifekaú, ‘oku makatu‘unga ‘i he ma‘u‘anga fakamatala ‘oku tokonaki fakamāhina ko e Polokalama Ngāue ki he Fakataha ki he Moʻuí mo e Ngāue Fakafaifekaú. Ko e ‘uluaki konga ‘o e fakataha ko ení, ko e Koloa mei he Folofola ‘a e ‘Otuá, ‘oku tokoni‘i ai kimautolu ke alāanga mo e lau Tohi Tapu ‘oku fai ki mu‘a ‘e he fakataha‘angá. Hokó, ko e Tokangataha ki he Ngāue Fakamalangá ‘oku kau ki ai ‘a e ngaahi fakahāhā ki he founga ke talanoa ai ki he Tohi Tapú mo e ni‘ihi kehé. ‘Oku ʻi ai ha faiakonaki ʻokú ne siofi kimautolu ʻa ia ʻe tokoniʻi ai ke fakalakalaka ʻemau pōtoʻi ʻi he lautohí mo e leá. (1 Tīmote 4:13) Ko e konga faka‘osí, ko e Moʻui ko ha Kalisitiane, ʻoku lāulea ai ki hono ngāueʻaongaʻaki ʻa e ngaahi tefitoʻi moʻoni Fakatohitapú ʻi he moʻui fakaʻahó. ʻOku kau heni mo ha fetalanoaʻaki fehuʻi mo e tali ʻokú ne fakalolotoʻi ʻemau mahinoʻi ʻa e Tohi Tapú.

‘I ho‘o ma‘u ‘emau ngaahi fakatahá, ‘oku ‘ikai ha veiveiua ‘e maongo kiate koe ‘a e tu‘unga ‘o e ako Fakatohitapu te ke ma‘u aí.​—‘Aisea 54:13.

• Ko e hā te ke ‘amanekina ‘e lava ke ke fanongo ai ‘i he ngaahi fakataha ‘a e Kau Fakamo‘oni ‘a Sihová?

• Ko fē ‘i he‘emau ngaahi fakataha fakauiké te ke sai‘ia ke ma‘u hono hokó?