Minhlangano ya Vakreste va lembe-xidzana ro sungula a yi katsa tinsimu, swikhongelo ni ku hlayiwa ka Matsalwa ma tlhela ma hlamuseriwa, a ku nga ri na mihivahivani. (1 Vakorinto 14:26) Hileswi u nga swi langutelaka eminhlanganweni ya hina.

Tidyondzo ta kona ti sekeriwe eBibeleni naswona ta twisiseka. Hi mahelo-vhiki, Timbhoni ta Yehovha ta hlengeletana emavandlheni yo hambana-hambana leswaku ti ta yingisela nkulumo leyi sekeriweke eBibeleni ya timinete ta 30, leyi hlamuselaka ndlela leyi Matsalwa ma khumbaka vutomi bya hina ha yona ni minkarhi leyi hi hanyaka eka yona. Hinkwerhu ka hina ha khutaziwa leswaku hi pfula Tibibele ta hina loko ku hlayiwa matsalwa. Endzhaku ka nkulumo, ku landzela Dyondzo ya “Xihondzo xo Rindza” leyi tekaka awara, laha eka yona xirho xin’wana ni xin’wana xa vandlha xi pfumeleriweke ku hlamula hi nkarhi wa dyondzo. Dyondzo leyi yi hi pfuna leswaku hi tirhisa nkongomiso wa Bibele evuton’wini bya hina. Eka mavandlha lama tlulaka 110 000 emisaveni hinkwayo ku dyondziwa rungula leri fanaka.

Ha pfuniwa leswaku hi antswisa ntirho wa hina wo chumayela. Hi tlhela hi khoma minhlangano ya swiyenge swinharhu ya Mahanyelo Ni Ntirho Wa Hina Wo Chumayela, leyi sekeriweke eka xiyimiso xa minhlangano xa n’hweti na n’hweti, xa Mahanyelo Ni Ntirho Wa Hina Wo Chumayela. Xiyenge xo sungula eka minhlangano leyi ku nga Leswi Hi Swi Dyondzaka eBibeleni, xi hi pfuna leswaku hi tolovelana ni rungula ra Bibele leri swirho swa vandlha swi ri hlayeke swi nga si ya eminhlanganweni. Xiyenge xa vumbirhi ku nga Ndzetelo Wa Ntirho Wo Chumayela, xi katsa minkombiso ya ndlela leyi hi nga bulaka ni van’wana hi Bibele ha yona. Loyi a nyikelaka ndzayo u nyikela swiringanyeto leswi hi pfunaka leswaku hi antswisa ndlela leyi hi hlayaka ha yona swin’we ni ndlela leyi hi dyondzisaka ha yona. (1 Timotiya 4:13) Xiyenge xo hetelela ku nga Mahanyelo Ya Vukreste xi kombisa ndlela leyi hi nga tirhisaka misinya ya milawu ya Bibele ha yona evuton’wini siku ni siku. Leswi swi katsa ni bulo ra swivutiso ni tinhlamulo leri hi pfunaka ku antswisa ndlela leyi hi yi twisisaka ha yona Bibele.

Loko u ya eminhlanganweni ya hina, handle ko kanakana u ta tsakisiwa hi nkoka wa dyondzo ya Bibele leyi u yi kumaka.—Esaya 54:13.

• I yini leswi u nga rindzelaka ku swi dyondza eminhlanganweni ya Timbhoni ta Yehovha?

• U nga tsakela ku ya eka minhlangano yihi ya vhiki na vhiki enkarhini lowu taka?