Omu nso’rokano z’Abakristaayo abaira habamuga ebizina, okusaba, okusoma, n’okusoborra Ebyahandiikirwe. (1 Abakolinso 14:26) N’ezaitu nukwo zitekaniziibwe.

Ebitwegesebwa bisigikirra ha Baibuli kandi bitugasira. Buli wiiki ebitebe byoona bigira orubazo orusigikirra ha Baibuli orumara edakiika 30 nirusoborra nkoku Ebyahandiikirwe bitugasira n’omu busumi obu turumu. Orubazo oburuba nirugenda omu maiso itwena nituterererwa kuhondera mu Baibuli zaitu. Hanyuma y’orubazo, tugira ekicweka eky’okukaguza n’okugarukamu nitukozesa akatabu akarukwetwa “Watchtower” okumara esaha emu. Ekicweka kinu kitukonyera kurora omulingo turukusobora kuteka ebitwegere omu nkora. Kinu kikorwa omu bitebe eby’Abakaiso ba Yahwe ebirukuhingura omu 110,000.

Tukonyerwa kusemeza omulingo twegesaamu. Twine oruso’rokano orundi orw’ebicweka bisatu orukwetwa Obwomeezi n’Obuheereza Bwaitu nk’Abakristaayo orubaho hagati omu wiiki. Oruso’rokano runu nirusigikirra ha puroguraamu enyakuli omu Katabu k’Enso’rokano aka buli kwezi. Ekicweka ky’okubanza nikyo ‘Ebiturukwega Kuruga omu Baibuli’ ekitukonyera kumanya bingi ebirukukwata ha kusoma Baibuli okwa wiiki. Ekicweka ekyongeraho nikyo, ‘Wekambire Obuheereza’ kirumu ebyokurorraho ebirukwoleka omulingo twegesa abantu Baibuli. Kandi ceyamaani ahabura abo abaine ebicweka kumanya omulingo basobora kusoma n’okwegesa kurungi. (1 Timoseo 4:13) Ekicweka eky’okumalirra ‘Obwomeezi Bwaitu nk’Abakristaayo’ kitukonyera kumanya nk’oku tusobora kuta omu nkora emisingi ya Baibuli omu bwomeezi bwaitu. Kandi ekicweka kinu kibamu kukaguza n’okugarukamu ekitukonyera kwetegereza Baibuli.

Obw’oraija omu nso’rokano zaitu n’oija kusemezebwa ebyorayega.—Isaya 54:13.

• N’onihira kuhu’ra ki omu nso’rokano z’Abakaiso ba Yahwe?

• Kicweka ki eky’enso’rokano ezituba nazo omu wiiki eki wakugondeze kubamu?