Ia putuputu te mau Kerisetiano matamua, i himene, pure, taio e aparau na ratou i nia i te mau Papai. (Korinetia 1, 14:26) Mai tera atoa ta matou mau putuputuraa.

Niuhia te haapiiraa i nia i te Bibilia e mea faufaa. I te hopea hebedoma, e putuputu te mau amuiraa no te faaroo i te hoê Oreroraa parau Bibilia e 30 minuti o te faataa e nafea te Bibilia i taaihia ˈi i to tatou oraraa e i te tau ta tatou e ora nei. E faaitoitohia te taatoaraa ia rave i ta ratou iho Bibilia. Ia oti te oreroraa parau, e faaterehia te Haapiiraa o “Te Pare Tiairaa” hoê hora. E nehenehe te mau mero o te amuiraa e pahono i te mau uiraa o te tumu parau o Te Pare Tiairaa e hiˈopoahia ra. E tauturu te reira ia matou ia faaohipa i te mau aratairaa Bibilia i roto i to matou oraraa. Hoê â tumu parau te haapiihia i roto hau atu i te 110 000 amuiraa i te ao nei.

Tauturuhia ia aravihi atu â i te haapii i te taata. E putuputu atoa matou i te hebedoma no te hoê porotarama e toru tuhaa parauhia Oraraa e taviniraa Kerisetiano o tei niuhia i nia i te papai taavaˈe Faaineineraa no te putuputuraa Oraraa e taviniraa Kerisetiano. E tauturu te tuhaa matamua o teie putuputuraa, Taoˈa rau Bibilia, ia matau maitai matou i te hoê tuhaa o te Bibilia ta te amuiraa i taio aˈena. I roto i te tuhaa i muri iho, A rave maite i ta oe taviniraa, te vai ra te tahi mau faahiˈoraa e nafea e aparau no nia i te Bibilia e vetahi ê. E horoa te hoê taeae aˈo i te tahi mau manaˈo no te tauturu ia taio e ia paraparau maitai atu â. (Timoteo 1, 4:13) I roto i te tuhaa hopea, Oraraa Kerisetiano, e hiˈopoahia te mau aratairaa Bibilia o te faaohipahia i roto i te oraraa i te mau mahana atoa. Te vai atoa ra te hoê aparauraa ma te mau uiraa e te mau pahonoraa o te faahohonu i to matou ite i te Bibilia.

Ia haere oe i ta matou mau putuputuraa, e maere oe i te maitai o te haapiiraa Bibilia e horoahia ra.—Isaia 54:13.

• Eaha ta oe e faaroo i te mau putuputuraa a te mau Ite no Iehova?

• E hinaaro oe e haere i teihea putuputuraa?