Бирги христианнар чыыштарынга ырлажып, мөргүп, Ыдыктыг Бижилгени номчуп, сайгарып турган (1 Коринфичилерге 14:26). Оларның кандыг-даа ёзулалдары чок турган. Бөгүн бистиң ужуражылгаларывыс база шак ынчаар эртип турар.

Өөредилге Библияга үндезилеттинген база амыдыралга ажыктыг. Дыштаныр хүннерниң бирээзинде хурал бүрүзүнге 30 минут дургузунда библейжи темага илеткел болуп турар. Аңаа амыдыралга Библияның биске канчаар дузалап болурун база делегейде болуушкуннарны ооң канчаар тайылбырлап турарын чугаалап турар. Шупту улус Библияны ажыткаш, сайгарып турар шүлүктерни эдертир көрүп болур. Илеткел соонда бир шак дургузунда библейжи статьяның сайгарылгазы эртип турар. Күзелдиг улус аңаа киржип болур. Шак ындыг сайгарылга библейжи дүрүмнерни амыдыралывыска ажыглаарынга дузалап турар. Бүдүн делегейде 110 000 хурал бүрүзүнде ол-ла материалды сайгарып турар.

Башкылаар мергежиливисти экижидип ап турар бис. Оон ыңай неделяның кежээлериниң бирээзинде база чыглып турар бис. Үш кезектен тургустунган ужуражылгавыстың адын «Христиан чуртталгавыс болгаш бараалгалывыс» дээр. Ол ужуражылга ай санында үнүп турар «Чуртталгавыс болгаш бараалгалывыс» деп ажылчын кыдырааштың материалынга үндезилеттинген. Ужуражылгавыстың «Бурганның Сөзүнден эртинелер» деп бирги кезээ биске Библияның эгелеринден ажыктыг чүүл өөренип алырынга дузалап турар. Дараазында «Суртаалды экижидери» деп кезээнге өскелер-биле Библияның дугайында канчаар чугаалажырын өөредир көргүзүглер болуп турар. Ол кезекке эрттирикчи биске номчулгага болгаш суртаалдаар арга-мергежиливисти бедидеринге хамаарыштыр сүмелер бээр (1 Тимофейге 4:13). А сөөлгү «Христиан чуртталгавыс» деп кезээнге библейжи дүрүмнерни амыдыралывыска канчаар ажыглаарын сайгарып турар бис. Олче, Библияны ханы билип алырынга дузалаар, айтырыглар болгаш харыылар дузазы-биле сайгарылга кирип турар.

Ужуражылгаларывыстың өөредилгезиниң шынары дыка бедик. Оларның бирээзинче келгеш, ону боттарыңар көрүп болур силер (Исайя 54:13).

• Иегованың Херечилериниң ужуражылгалары канчаар эртип турарыл?

• Неделя санында эртип турар чыыштарның кайызынче ылаңгыя баарын күзээр-дир силер?