Нырысетӥ христианъёс пумиськонъёсазы кырӟанъёс кырӟало, вӧсясько, озьы ик Священной Гожтэмез лыдӟо но эскеро вал (1 Коринфъёслы 14:26). Туннэ но пумиськонъёсмы со выллем ик ортчо.

Дышетскон Библия вылэ пыкиське но улонын юрттэ. Одӥгаз шутэтскон нуналэ котькуд кенешын 30-минутъем библейской речь верало, кудӥз возьматэ, кызьы Библия милемлы улонын юрттыны быгатэ но кызьы со дуннеысь югдуръёсты валэктэ. Ваньзы ӧтисько асьсэлэсь Библизэс усьяны но чакланы, мае лыдӟо. Речь бере одӥг час ӵоже Библиез дышетыны юрттӥсь статьяез эскерон ортче. Ваньмыз мылкыд карисьёс со эскеронэ пыриськыны быгато. Сыӵе эскерон юрттэ милемлы Библиысь возетъёсты улонамы кутыны. Быдэс дунне вылын котькудаз 110 000 кенешъёсын одӥг материал эскериське.

Дышетыны быгатонлыкъёсмес умоятӥськомы. Озьы ик ми люкаськиськомы арня вискысь одӥгаз ӝытазе. Нырысь 30-минутъем кенешын Библиез дышетон ортче. Со ортчытӥське юанъёсын но валэктонъёсын. Та дышетон милемлы Библиысь возетъёсты но азьпалзэ ивортонъёсты умойгес валаны юрттэ. Пумиськонлэн мукет люкетэз — Инмарлы ужан-тыршон школа. Таиз 30-минутъем пумиськон кутске Библиысь люкетъёсты эскеронэн, кудъёссэ кенеш азьло ик лыдӟиз. Собере Школае гожтӥськем дышетскисьёс дасям вакчи заданиоссэс сцена вылын возьмато. Быгатӥсь дышетӥсь котькуд дышетскисьлы юрттэ умойгес лыдӟиськыны но вераськыны (1 Тимофейлы 4:13). Пумиськонлэн йылпумъясь люкетэз — 30-минутъем ужаны-тыршыны дышетӥсь пумиськон. Речьёс, возьматонъёс но интервьюос кылзӥсьёслы дышетскыны юртто Библиысь зэмлыкез мукет адямиослы вераны.

Пумиськонъёсамы туж умой дышето. Сое тӥ асьтэос адӟоды, одӥгаз сыӵе пумиськонэ лыктыса (Исаия 54:13).

• Кызьы ортчо Иеговалэн Адӟись-Ивортӥсьёсызлэн пумиськонъёссы?

• Кудаз котькуд арняе ортчись пумиськонамы тӥляд лыктэмды потэ?