Vwẹ emẹvwa rẹ Inene-ri-Kristi rẹ ẹgbukpe ujorin ẹsosuọ, a so ine, a nẹrhovwo, e se ẹkpo ri Baibol sansan, e ji dje kpahen ayen. (1 Kọrẹnt 14:26) Ọtiọyen uyono avwanre je hepha.

Baibol na yen uyono na nẹ cha. Vwẹ ẹdidjana rode, ikoko sansan kerhọ rẹ Ota Rotu ri Baibol vwẹ ibrẹro 30, ro dje oborẹ Baibol na sa chọn avwanre uko vwẹ akpeyeren, vẹ obo rọ ta kpahen ọke avwanre nana. Ofori nẹ e rhie Baibol avwanre vwo nene ọtota na. E de nyo ota rotu na nu, kẹ avwanre vwẹ unọke ọvo vwo ruẹ Uyono ri “Watchtower.” Vwevunrẹ uyono nana, ihwo kpahan phiyọ enọ rehẹ asan re yono na. Uyono na chọn avwanre uko vwọ reyọ odjekẹ ri Baibol na vwo ruiruo. Watchtower vuọvo yen e yono vwẹ ikoko rehẹ akpọneje, re vrẹ 110,000.

Ọ nẹrhẹ ona rẹ avwanre vwo yono ihwo yovwẹn phiyọ. O ji vwo uyono ro vwo ẹbẹre erha rẹ avwanre ruẹ vwẹ ovwọnvwọn vwẹ uvwre rẹ udughwrẹn na re se Akpeyeren Avwanre vẹ Iruo Ruvie Na. Ọbe Uyono rẹ Akpeyeren Avwanre vẹ Iruo Ruvie Na, ọyen e vwo ruẹ uyono nana. Ẹbẹre ẹsosuọ re se Hiẹ Guọnọ Efe Na, chọn avwanre uko vwọ fuẹrẹn ẹkpo rẹ Baibol rẹ ukoko na se phiyotọ nẹ uwevwin rhe. Ẹbẹre rivẹ rọ dia Muomaphiyọ Iruo Aghwoghwo Na, vwo idje rẹ obo ra sa vwọ reyọ Baibol na vwo ghwoghwo ota kẹ ihwo. Oniọvo ro tedje me rha vwẹ odjekẹ evo vwọphia re sa nẹrhẹ avwanre ru yovwinphiyọ vwẹ ona rẹ ota vẹ isese rẹ avwanre. (1 Timoti 4:13) Ẹbẹre rọ koba rọ dia Akpeyeren rẹ Inenikristi, me rha fuẹrẹn obo ra sa vwọ vwẹ iji rẹ Baibol na vwọba akpọ yerin kẹdẹ kẹdẹ. Eta ri vwo enọ vẹ ẹkpahọnphiyọ jehẹ ẹbẹre nana re nẹrhẹ avwanre nabọ vwọ ẹruọ rẹ Baibol na.

Wọ da rhe omẹvwa avwanre, obo wo che yono nẹ Baibol na rhe cha kẹ wẹ omavwerhovwẹn.​—Aizaya 54:13.

• Die yen wọ cha mrẹ vwevunrẹ emẹvwa rẹ Iseri ri Jihova?

• Ọvọ vwẹ usun rẹ emẹvwa avwanre na yen wọ guọnọ rhe?