Thangu baklisto ba thete babekutakananga, babeyimbilanga maluimbu, sambilanga, tanga Masonoko, ayi sudikisa mawu. Kuisi banga ko milulu. (1 Kolinto 14:26) Buawu bobo phe zikhutukunu zieto zieta salimina.

Malongi mu Bibila meta ba ayi madi mu diambu di kutusadisa. Kadika kimvuka kieta kutakana kisabala voti ki lumingu muingi mu wa Diskure yi Bibila mu lokula ki 30 miniti. Diskure beni yeta monisa phila yoyi Masonoko matubidi mambu momo matadidi luzingu lueto ayi thangu eto. Mutu woso weta kindusu ti kalandakana mu Bibila kiandi. Diskure yawu mana tuetalandakana Ndongokolo yi “Nkengidi” mu lokula ki wola mosi. Mutu woso lenda vana mimvutu mu disolo diodi dibedi mu Nkengidi wu ndongokolo. Ndongokolo beni yeta kutusadisa muingi tusadila malongi ma Bibila mu luzingu lueto. Disolo di phila mosi kaka bimvuka bioso mu nza yimvimba viokila 110000 tueta longuka.

Kueta kutusadisa tukudisa diela dieto dilonga. Tueta bokutakana lumbu kimosi va khati sabala mu diambu di zikhutukunu zitatu. Yi thete, Ndongokolo yi Bibila yi Kimvuka mu lokula ki 30 miniti. Mu biuvu ayi mimvutu yeta salimina, ayi yeta kutusadisa muingi tubakula tsundu yi zitsikudukusu ayi zimbikudulu zi Bibila. Ku manima, Kalasi yi Kisalu ki Teokrasi mu lokula ki 30 miniti. Kalasi beni yeta tonina mu disolo di tini ki Bibila kioki bankutakani batengi tekila biza ku lukutukunu. Bana ba kalasi beni beta tula masolo makhufi. Phangi mosi weta vana malongi muingi tuluta ba diela mu tanga ayi tuba. (1 Timoteo 4:13) Ku tsuka, Lukutukunu lu Kisalu mu lokula ki 30 miniti. Yikala ayi zidiskure, bifuani, ayi masolo-mu-biuvu ayi yeta kutusadisa tuzaba phila yoyi tulenda longila batu Bibila.

Nge kuiza ku zikhutukunu zieto, wela yangalala mu mona phila yo malongi ma Bibila momo wela baka makadila kitoko kiwombo.—Yesaya 54:13.

• Mambu mbi wela wa ti wedi ku zikhutukunu zi Zimbangi zi Yehova?

• Mu lukutukunu mbi wela tia kuiza mu khumbu yinkuiza?