U yáax disipuloʼob Jesuseʼ, maases ku muchʼkubaʼob kaʼach utiaʼal kʼaay, orar, xook yéetel u xakʼalxoktikoʼob baʼax ku yaʼalik le Kiliʼich Tsʼíiboʼoboʼ (1 Corintoiloʼob 14:26). Ken xiʼikech teʼ muchʼtáambaloʼob ku beetik u j-jaajkunajoʼob Jéeobaoʼ yaan a wilik bey xan u beetkoʼoboʼ.

Teʼ Biblia ku jóoʼsaʼal le baʼaxoʼob ku kaʼansaʼaloʼ. Utiaʼal sábado wa domingoeʼ, cada múuchʼulileʼ ku bin u yuʼub u máansaʼal junpʼéel tsoltʼaan utiaʼal tuláakal, lelaʼ ku xáantal media hora, teʼeloʼ ku tsoʼolol baʼax yaan u yil k-kuxtal yéetel le baʼaxoʼob ku yaʼalik le Biblia táan u yúuchloʼoboʼ. Ku yaʼalaʼal xan tiʼ le muchʼukbaloʼob ka u seguertoʼob u xookil le tekstoʼob tu bibliaʼoboʼ. Ken tsʼoʼokkeʼ ku káajal u Xookil U Pʼíich Tulumil Kanan, lelaʼ ku xáantal junpʼéel hora yéetel ku invitartaʼal máak utiaʼal ka u núuk le kʼáatchiʼob ku beetaʼaloʼ. U beetaʼal beyaʼ ku yáantaj utiaʼal ka u yil máak le jejeláas bix jeʼel u beetik le baʼax ku yaʼalik le Bibliaoʼ. Junpʼéeliliʼ baʼax ku kaʼansaʼal tiʼ le maas tiʼ ciento diez mil múuchʼuliloʼob yanoʼob tuláakal yóokʼol kaaboʼ.

Ku yáantkoʼon kaʼansaj tubeel. Tu yáam semanaeʼ k-muchʼikba xan juntéen utiaʼal junpʼéel muchʼtáambal yaan óoxpʼéel jaats tiʼ, ku kʼaabaʼtik Kuxtal yéetel Meyaj jeʼex Cristoeʼ, lelaʼ ku chʼaʼabal tiʼ le publicación ku jóokʼol cada mes ku kʼaabaʼtik U juʼunil xook utiaʼal u muchʼtáambalil Kuxtal yéetel meyaj jeʼex Cristoeʼ. Le yáax jaats «Jatsʼuts baʼaloʼob k-kanik tiʼ le Bibliaoʼ», ku yáantkoʼon k-maas naʼat junpʼéel jaats tiʼ le Biblia k-yáax xokmajoʼ. Ken tsʼoʼokkeʼ teʼ jaats «Kaʼansajnakoʼon maʼaloboʼ», ku yeʼesaʼal bix jeʼel k-tʼaan tiʼ baʼax ku yaʼalik le Biblia yéetel uláakʼ máakoʼoboʼ. Le sukuʼun nuʼuktikoʼ ku yaʼalik baʼaxoʼob jeʼel u yáantkoʼon utiaʼal k-maas maʼalobkíintik le bix k-xook yéetel le bix k-tʼaanoʼ (1 Timoteo 4:13). Tu tsʼookeʼ teʼ jaats «Kuxlakoʼon jeʼex Cristoeʼ», ku yeʼesiktoʼon bix jeʼel k-tsʼáaik sáamsamal ich k-kuxtal le baʼax ku yaʼalik le Bibliaoʼ. Teʼ jaatsaʼ k-kʼuchul k-maas naʼat baʼax ku yaʼalik le Bibliaoʼ, tumen ku beetaʼal kʼáatchiʼobiʼ yéetel ku páaʼtaʼal ka u núuk máak.

Ken xiʼikech teʼ muchʼtáambaloʼoboʼ yaan a wilik bix le jach maʼalob kaʼansaj k-kʼamik teʼ Bibliaoʼ (Isaías 54:13).

• Ken xiʼikech teʼ muchʼtáambaloʼob ku beetik u j-jaajkunajoʼob Jéeobaoʼ, ¿baʼaxoʼob ken a wil ku beetaʼaliʼ?

• ¿Máakalmáak tiʼ le muchʼtáambaloʼob a kʼáat a yáax bin a wil bix u beetaʼaloʼ?