Ca primé xpinni Cristu bidagulisaacaʼ ne raqué biindacaʼ diidxaʼ riuundaʼ, biʼniʼ orarcaʼ, biindacaʼ Stiidxaʼ Dios ne biénecaʼ xiná ni (1 Corintios 14:26). Ora cheluʼ ca guendaridagulisaa stidu zuuyaluʼ laaca zacaca rúnidu.

Rizíʼdidu ni zanda gacané laadu ne zeedacani lu Biblia. Ca sábadu o domingu, guiráʼ ca neza binni ridagulisaa rucaadiágacaʼ ti libana ni cusiidiʼ cani cá lu Biblia, rindaani treinta minutu ne luni rusiénecabe ximodo racané Biblia binni lu xquendanabani ne rusiéneni xi tiempu nabáninu yanna. Runi invitárcabe cani cucaadiaga guxhélecaʼ Biblia sticaʼ ne chinándacaʼ ra cayuundacabe. De racá maʼ riuundaʼ revista Torre stiʼ ni rapa, rindaani ti hora, ne raca invitar ca binni ridagulisaa guicábicaʼ ora guinabadiidxacabe ni zeeda lu ca tema stini. Revista riʼ rusiene ximodo chinándadu ca conseju zeeda lu Biblia lu xquendanabánidu. Ndaaniʼ jma de ti gayuaa chii mil neza binni ridagulisaa ni nuu lu guidubi naca Guidxilayú ridúʼndadu ngueca tema stiʼ revista ca.

Racaneni laadu gánnadu gusíʼdidu jneza. Laaca ridagulisaadu ti gueelaʼ ndaaniʼ semana ne nápadu ti programa de chonna ndaa ni láʼ Xhiiñaʼ Dios ne modo nabánidu, reeda programa stini lu ti publicación ni láʼ Ni chigaca lu reunión Xhiiñaʼ Dios ne modo nabánidu. Primé ndaa stiʼ programa riʼ láʼ «Ca tesoro zeeda lu Biblia», racané ni laadu guiénedu xiixa ni zeeda lu Stiidxaʼ Dios ni maca bidúʼndanu ante chuudu reunión riʼ. De racá maʼ nuu sti ndaa ni láʼ «Gusíʼdinu jma jneza», raríʼ ridiʼdiʼ caadxi demostración ni rusiidiʼ laadu ximodo guinínedu xcaadxi binni de Biblia. Nuu ti hermanu ni rudii conseju laadu para guizíʼdidu gúʼndadu ne gudiʼdu discursu jma jneza (1 Timoteo 4:13). Últimu ndaa stini láʼ «Modo rúninu xhiiñaʼ Dios», lu ni rizíʼdidu ximodo gúnidu ni na ca conseju zeeda lu Biblia lu xquendanabánidu. Lu ndaa riʼ runi estudiardu ne riénedu xiixa ni zeeda lu Biblia purtiʼ raca pregunta para guicábidu.

Ora cheluʼ ca guendaridagulisaa stidu zadxagayaaluʼ modo rusíʼdidu binni ni cá lu Biblia (Isaías 54:13).

• Xi zuuyaluʼ ora cheluʼ guendaridagulisaa stiʼ ca testigu stiʼ Jiobá.

• Gunáʼ de ca guendaridagulisaa rápadu guiráʼ semana ñuuláʼdxiluʼ ñeluʼ primé.