Nin gafenin jaw fɛ, yala aw ye a jateminɛ ko Jehova Seerew b’u labɛn ka ɲɛ walasa ka taa u ka lajɛw la wa? Mun na an b’an janto kosɛbɛ an ka fini dontaw la?

Ala bonya kosɔn. Tiɲɛ don ko Ala t’a sinsin mɔgɔ ye cogo dɔrɔn kan. (1 Samuɛl 16:7) Nka n’an b’a bato an faralen ɲɔgɔn kan, a ka di an ye ka bonya d’a kan ani ka bonya da an ni minnu bɛ ɲɔgɔn fɛ kan. Ni an ka kan ka taa kiritigɛla dɔ ɲɛkɔrɔ, a ka jɔyɔrɔ bonya kosɔn, an bɛna an janto an ka fini don cogo la. O cogo kelenna, an ka lajɛw waati la, an ka fini dontaw bɛ an ka bonya jira ka ɲɛsin “dugukolo bɛɛ ka kiritigɛla” ma, ni o ye Jehova Ala ye ani an ka bato kɛyɔrɔ kan.—Jenɛse 18:25.

An ka ɲɛnamaya jogoɲumanw kosɔn. Bibulu bɛ dusudon krecɛnw kɔnɔ “minnu ko u bɛ siran Ala ɲɛ” u “ka fini bɛnnen don minnu bɛ u sutara.” (1 Timote 2:9, 10) Ka fini “bɛnnen” don o kɔrɔ ko i kana dagabana fini don min b’a to bɛɛ b’i filɛ, ani fini kuntanw walima fini min b’a to mɔgɔw bɛ miiriya dɔw kɛ i kan. Min ye ka fini don min bɛ i “sutara”, o b’an dɛmɛ ka fini ɲumanw sugandi, o min tɛ fini lagasaw ye. Nin sariyakolo ninnu ba to an bɛ se ka sugandili caman wɛrɛw kɛ, an yɛrɛ ye ka kɛɲɛ ni an jaɲɛkow ye. K’a sɔrɔ an ma fɛn fɔ, an bɛ se ka an “kisibaa ka kalan bonya” ani “ka Ala tanu” ni fini ɲuman donni ye. (Tite 2:10; 1 Piɛrɛ 2:12) Ni an b’an labɛn ka ɲɛ an ka lajɛw kama, an bɛ bato min kɛ Jehova ye, o bɛ ye yecogo ɲuman na.

Nka aw ka fini dontaw kana aw bali ka na an ka lajɛw la. Fini mago tɛ ka kɛ fini dagɛlen ye, min bɛ sanga la walisa a ka kɛ fini bɛnnenw ye, fini jɛlenw ye ani minnu yecogo ka ɲi.

• Mun na an bɛ fini min don nafa bɛɛ o la ni an bɛ Ala bato?

• Sariyakolo jumɛnw bɛ an ɲɛminɛ an ka fini dontaw sugandili ko la?