Peda gambar dalam bup tu. Peratika pemanah gaya bala Saksi-Saksi Jehovah begari maya sida datai begempuru. Nama kebuah kami beberatka chara kami begari enggau ngintu diri?

Meri basa ngagai Petara kami. Endang amat, Petara ukai semina meda gamal aja. (1 Samuel 16:7) Taja pia, maya kami begempuru deka nyembah Iya, ati kami deka ngayanka basa ngagai Iya enggau ngagai bala sama pengarap. Enti kitai bediri ba mua hakim dalam rumah bechara, kitai tentu begari enggau manah laban bebasaka pangkat iya. Pia mega, gaya kami begari ba gempuru ngayanka basa ti besai ngagai “Hakim ke ngakim semua dunya,” Petara Jehovah, enggau ngagai palan endur kami nyembah Iya.—Pemungkal 18:25.

Kena ngayanka chara pengidup kami. Bup Kudus meransang orang Kristian begari enggau “penumbas iya sereta menyana.” (1 Timoti 2:9, 10) Begari enggau “penumbas iya” reti nya enda ngena gari ti kelalu mar tauka mayuh ngayanka tubuh diri. Pia mega, runding ti “menyana” nulung kami milih gari ti manah sereta kemas. Taja pan kami nitihka prinsip tu, tang kami agi ulih milih kediri empu. Gari kami ti manah sereta penumbas iya ulih ‘mai puji ngagai ajar ti diberi Petara ti Juruselamat kitai,’ lalu ngemuliaka Iya. (Titus 2:10; 1 Peter 2:12) Maya kami datai begempuru enggau gari ti manah, kami ulih mandangka orang bukai chara kami nyembah Jehovah.

Taja pan nuan nadai gari ti formal, nuan mega ulih datai begempuru ba Palan Gempuru. Gari kitai enda ibuh mar tauka mayuh gaya, tang patut beresi enggau manah dipeda.

• Nama kebuah beguna bendar kitai begari enggau manah maya nyembah Petara?

• Nama prinsip ti nulung kitai milih gari enggau ngintu diri?