¿Á ndéʼé miíní ndijaá naʼná ña̱ va̱si nuu̱ tutu yóʼo ndixi ví vií ndísi nduʼu̱ na̱ testigo Jeová tá kuaʼa̱n ndu̱ nuu̱ nátaka ndu̱? Ta, ¿ndiva̱ʼa ndíʼi ini nduʼu̱ ña̱ va̱ʼa ná kunaʼa̱ jáʼma̱ ndú, ta ña̱ kandisi vií ndu̱?

Jáchi̱ ió ña̱ñúʼú nduʼu̱ nuu̱ Ndio̱s. O̱ju̱ú si̱va̱ʼa ndixi náʼa̱ uun ni yó si̱nde̱ʼé Ndio̱s (1 Samuel 16:7). Jo, tá nátaka nduʼu̱ ndáñu̱ʼu ndu̱ Ndio̱s, ña̱ kúni̱ nduʼu̱ kía̱n koo ña̱ñúʼú ndú nuu̱ sí, ta jaá ní nuu̱ ñani táʼan ndu̱. Tá ná kanian kuʼu̱n yó nuu̱ iin juez, kandisi vií yó kuʼu̱n yo̱. Ki̱ʼa jaá ní ndísi vií nduʼu̱ tá kuaʼa̱n ndu̱ nuu̱ nátaka ndu̱, jáchi̱ jaá náʼa̱ nduʼu̱ ña̱ kéekáʼno ndu̱ Jeová Ndio̱s “ta kúú Juez nuu̱ ndijaá na̱ ndóyi nuu̱ ñúʼu̱ yóʼo”, ta jaá ní náʼa̱ nduʼu̱ ña̱ ió ña̱ñúʼú ndu̱ saʼa̱ nu̱ú nátaka ndu̱ ndáñu̱ʼu ndu̱ Ndio̱s (Génesis 18:25).

Jaá náʼa̱ nduʼu̱ ña̱ kúú ndú na̱yivi ndísáʼno. Káʼa̱n Tu̱ʼun Ndio̱s xíʼín na̱ kuéntá Cristo ña̱ “ná koo ndísáʼno na ndaʼví ni ná kandixi na” (1 Timoteo 2:9, 10). Ña̱ kandisi “ndaʼví” yó kúni̱a̱n kachian ña̱ ko̱ kánian kandisi yó jáʼma̱ ña̱ tívi níí ku̱ñu yo̱, ta ná o̱kándisi yó jáʼma̱ tuun. Tá ná kukuu yó na̱yivi na̱ “ndísáʼno” ini jaá kía̱n ka̱si va̱ʼa yó jáʼma̱ kandisi yó, ta o̱kándisi yó jáʼma̱ kini káa. Jo, consejo yóʼo chíndeéán miíyó jáchi̱ kuu va kandisi yó jáʼma̱ ña̱ kútoó yo̱. Va̱árá ná o̱káʼa̱n yó ni iin tu̱ʼun jo, jáʼma̱ ndísi yó naʼa̱ ña̱ “ndató ndivaʼa kúú Tu̱ʼun Ndióxi̱, ña̱ káʼa̱n saʼa̱ mé á jáka̱ku a mí”, ta ‘kaja káʼnu na siʼ (Tito 2:10; 1 Pedro 2:12). Tá ná kandisi vií yó kuʼu̱n yo̱ nuu̱ nátaka yó ña̱yóʼo keean ña̱ kaʼa̱n va̱ʼa na̱yivi saʼa̱ na̱ ñuu Jeová Ndio̱s.

Vií ná koo jáʼma̱ yó ta vií ná kunaʼa̱ ña̱. Ko̱ kánian kandisi ní jáʼma̱ yaʼvi á jáʼma̱ va̱ʼa já kuu kisi ní Veʼe nuu̱ nátaka na̱ testigo Jeová.

• ¿Ndiva̱ʼa kánian kandisi vií yó tá nátaka yó ndáñu̱ʼu yó Ndio̱s?

• ¿Ndá consejo va̱si nuu̱ Tu̱ʼun Ndio̱s kuu chindeé miíyó tá kuaʼa̱n yó ka̱si yó jáʼma̱ kandisi yó?