Na bafoto ya mua mukanda yayi, nge memona mutindu beto Bambangi ya Yehova beto kevuataka mbote na balukutakanu ya beto? Samu na yinki beto kekubikaka mvuatulu ya beto mpe beto kebongisaka nzutu mutindu yina?

Samu na kuzitisa Nzambi ya beto. Yau kele diambu ya kedika ti Nzambi ketulaka dikebi mingi na ntima ya muntu kuluta mutindu yandi kena kumonana na meso ya bantu. (1 Samuele 16:7) Kasi, ntangu beto kekutakanaka samu na kusambila yandi, beto kevuandaka na nsatu ya ngolo ya kumonisa ti beto kezitisaka Nzambi mpe bampangi ya beto. Na kifuani, kana beto mezola kukutana na mfumu mosi, beto kevuataka mbote samu na kumonisa ti beto kena pesa yandi luzitu. Mutindu mosi mpe, mvuatulu mpe kobongisa nzutu na balukutakanu yau kemonisaka ti beto kena zitisa Yehova Nzambi, Mfumu “ya bantu nionso,” mpe beto kena zitisa kisika yina beto kesambilaka yandi.​—Kuyantika 18:25.

Samu na kumonisa ti beto kesadilaka mpenza malongi ya beto. Biblia mekindisa baklisto ‘bavuata na kukondua lulendo mpe bavuanda na mabanza ya mbote’ lokola bantu yina ‘kezitisaka Nzambi.’ (1 Timoteo 2:9, 10) Kuvuata ‘na kukondua lulendo’ zola tuba kumanga kubenda dikebi ya bantu na kutala nge samu nge mevuata bilele samu na kukizangula, to bilele yina kena kulamusa bansatu ya nzutu, to yina mebika bitini ya nzutu na nganda. Katula yau, ‘kuvuanda na mabanza ya mbote’ kesadisaka beto tozaba kupona bilele yina kele ya mbote, kasi yina ve kele mpambampamba to ya kimvuanzi. Kasi malongi yango mebikila muntu na muntu kipuanza ya kupona bilele yandi mezola. Yavuanda ata beto kena samuna ve, mvuatulu na beto ya mbote mpe yina mebonga lenda ‘pesa lukumu na malongi ya Mvuluzi na beto’ mpe ‘kupesa Nzambi nkembo.’ (Tito 2:10; 1 Piere 2:12) Kana beto kena vuata mbote na balukutakanu na beto, yau ketinda bayankaka basepela na nsambudulu ya Yehova.

Kubika ve bilele yau pekisa nge kukutakana na Yinzo ya Kimfumu. Yau lomba ve nge vuata bilele ya ntalu to ya kitoko mingi samu nge bima kitoko mpe nge monika ya kuvedila na meso ya bantu.

• Samu na yinki yau kele mfunu beto vuataka mbote ntangu beto kena sambila Nzambi?

• Yinki dilongi ya Biblia beto kelandaka na diambu metadila mvuatulu mpe kubongisa nzutu?