Nga omwene una Mbangi za Yave betoma vuatilanga vava bekwendanga muna tukutakanu twau nze una omwene muna mafoto ma finkanda fiafi? Ekuma tutoma vuatilanga ye kuyikubika?

Muna zitisa Nzambi eto. Dialudi vo Nzambi kesianga sungididi muna mpw’eto ko. (1 Samuele 16:⁠7) Kansi, vava tukutakananga muna sambila Nzambi, ekani dieto i kunzitisa yo zitisa mpe mpangi zeto. Avo batubokele twenda vana ntadisi a ntinu yovo nyadi a nsi, tutoma vwata yo kuyikubika muna kunzitisa. Diau dimosi mpe, e mpila tuvuatilanga ye kuyikubika vava tukwendanga muna tukutakanu tweto, isonganga vo Yave wa Nzambi wa “Ntinu a mvu ya mvu” tuzitisanga kumosi ye fulu kina tukunsambilanga.​—1 Timoteo 1:⁠17.

Tusonganga vo tulemvokelanga e nkanikinu mia Nzambi. Nkand’a Nzambi ukasakesanga Akristu bavuatilanga kuna “vumi yo lulungalalu” wau vo ‘bevuminanga Nzambi.’ (1 Timoteo 2:​9, 10) O vuata “yo vumi” disongele vo tufwete venga e mvuatu milenda fila wantu mu kutusia e sungididi kiasaka, i sia vo mvuatu miansoni misonganga e nitu. O kala ‘walungalala’ dikutusadisa mpe mu lembi vuata e mvuatu mia mvindu yovo miavuangalakana. E nkanikinu miami mivananga elau kwa konso muntu mu sola e mvuatu mina kazolele. Kana nkutu katuvovele diambu ko, e mvuatu miambote ye mpw’eto, ilenda ‘viengesa e longi dia Nzambi wa Mvuluzi eto.’ (Tito 2:10; 1 Petelo 2:​12) Muna toma vuata vava tukwendanga muna tukutakanu tweto, tulenda fila akaka mu sambila Yave.

Kuyambula ko vo e mpil’aku ya vuatila yasimba mu lembi kwenda muna Seka dia Kintinu. Ke dina mfunu ko vo e mvuatu mieto miakala mia ntalu yayingi muna kala miambote, kansi mifwete kala miavelela ye mialuzitu.

• O toma vuata nkia mfunu kwina vava tusambilanga Nzambi?

• Nkia nkanikinu tufwete sadila vava tusolanga e mvuatu yo kuyikubika?