Lelo ubamone pa mafoto a uno boloshile muvwadile senene Batumoni ba Yehova kitatyi kyobenda ku kupwila? Mwanda waka tutanga mutyima ku muvwadilo ne mwidyangwilo wetu?

Mwanda wa kulēmeka Leza wetu. Shako Leza katalangapo enka mumwekelo wa panja. (1 Samwele 16:7) Inoko, potwibunga mwanda wa kumutōta, tusakanga kumulēmeka ne kulēmeka batōtyi netu. Shi abetwite mu kidye ku meso a mutyibi kankenge, mwene twikalanga tuta mutyima ku mumwekelo wetu mwanda wa kumulēmeka? Mo monka ne muswelo otumweka ku kupwila ulombola’mba tulēmekele Yehova Leza, “Mutyibi wa ntanda yonso,” ne kifuko kine kyotumutōtela’po.—Ngalwilo 18:25.

Mwanda wa kuyukanya misoñanya yotulonda mu būmi. Bible ukankamikanga bene Kidishitu bavwale “na butūkanye ne ñeni mibwane.” (1 Temote 2:9, 10) Kuvwala “na butūkanye” kushintulula kwepuka bivwalwa bitulumuna bantu, bilangula kilokoloko, nansha bimwekeja ngitu panja. Kadi kwikala na “ñeni mibwane” nako kwitukwashanga tutonge bivwalwa biyampe, ke bya busalapo nansha bipite’byo kipimo. Ino milangwe ishilanga bantu bwanapabo bukatampe bwa kutonga. Pampikwa’tu ne kunena, mumwekelo wetu muyampe ne usangaja ubwanya ‘kunengeja mu miswelo yonso bufundiji bwa Umpandiji wetu’ ne ‘kutumbija Leza.’ (Tetusa 2:10; 1 Petelo 2:12) Kuvwala biyampe pa kwenda ku kupwila, kulengejanga bantu bakwabo bamone biyampe mutōtelo wa Yehova.

Kokaleka mbwija yodi nayo ikukankaje kukapwila ku Njibo ya Bulopwe. Tukokeja kuvwala bivwalwa bitōka kadi bimweka biyampe ku bantu, kebilombepo’nka kwikala bya bei nansha bya katutu.

• Mwanda waka muvwadilo wetu udi na mvubu kitatyi kyotutōta Leza?

• I misoñanya’ka ituludika pa kutonga muvwadilo ne mwidyangwilo wetu?