A gui jñanrrageba kja ne xiskuama ja ga kjaa yo bʼitu kʼꞹ ri jegojme yo ri testigojme e Jehová ma ri pojme nu ja ri jmurgojme. Ri jegojme bʼitu kʼo me na zøø. ¿Pjekja ri kjagojme ga kjanu?

Ri respetaojme in Mizhokjimigojme. Ri pa̱ra̱jme ke e Mizhokjimi sʼiya nrrexe yo ntee, angeze dya janrra ja ga kjaa in bʼitugojme, dya janrra kjo na zøø o kjo dya na zøø (1 Samuel 16:7). Ma ri jmurjme ri jegojme in bʼitu kʼꞹ ra ñetsʼe na joo ngekʼua yo ntee ra jñanrrgajme ri kjagojme kʼo na joo ja ga nee e Mizhokjimi. Nzakja mꞹ ro bʼꞹbʼꞹ na ntee kʼꞹ xojñi jmuʼu kja in país, ro xitsʼi rgui mage ja pɇpjikʼꞹ, ¿ja rga kjaa in bʼitu kʼꞹ ri jyege? E Jehová ngeje Xojñi Jmuʼu nrrexe kja ne Xoñijomꞹ, ngekʼua ma ri pojme nu ja ri jmurjme ri jegojme bʼitu kʼꞹ ñetsʼe na joo. Ga kjanu ñetsʼe ke me na joo kʼo jitsʼkojmenu (Génesis 18:25).

Yo ntee ra unꞹji nguenrra ke bʼemi ri kjagojme kʼo na joo. Ne Biblia mama ke yo ntee yo matrʼꞹji Mizhokjimi jeji o bʼitu kʼꞹ ñetsʼe na joo ñe “dya nda ni mubi” (1 Timoteo 2:9, 10, yo dʼayʼo jñaʼa mižokjimi kʼwaja ga tʼopjü kja jñatjo [NTD]). Ngekʼua dya ri jegojme bʼitu kʼꞹ na nzhꞹʼꞹ, yo bʼitu kʼꞹ kjapꞹjme ra ñetsʼe in kuerpo, yo bʼitu kʼꞹ na nojo o kʼꞹ na tsʼikʼe. Zo nge ga kjanu, kʼo mama ne Biblia pjøxkꞹjme ra juajnꞹjme pje ma bʼitu ra jegojme. Ma ra jegojme in bʼitu kʼꞹ na zøtrjo ñe kʼꞹ dya na poxꞹ, ga kjanu “ra unꞹ nguenrra yo ntee, kʼꞹ na joo [o] jñaa [...] Mizhokjimi”. Zo dya pje ra xipjiji, angezeji ra nee ra tsjaji kʼo mama e Jehová (Tito 2:10; 1 Pedro 2:12). Ma ri pojme jakʼo ri jmurjme ri jegojme bʼitu kʼꞹ na zøtrjo, ga kjanu yo ntee unꞹji nguenrra ri kjagojme kʼo mama e Jehová kja ne Biblia.

Dya ri xitsʼi ri jyee bʼitu kʼꞹ na mizhi ngekʼua ri mage ja ri jmurgojme. Ma ri mage dya ri jyee bʼitu kʼꞹ na poxꞹ, ri jyodʼꞹ bʼitu kʼꞹ na joo rga ñetsʼe kʼua ja ga nee e Jehová.

• Ma ri jmurꞹjme, ¿pjekja ri jegojme bʼitu kʼꞹ na zøø?

• ¿Ja ga mbøxkꞹjme ne Biblia ngekʼua ra juajnꞹjme pje ma bʼitu ra jegojme?