Nhoona ifootu ciri nhina ila ibroxureela inanna Masaahiti a Yehova cinwaraaya saana woorwaa mmikutthaanoni caya? Kontha isiyani nintepeehu uwacera inanna yo wiilokihaca ni yoowara?

Kontha nimpheela unhisimu Nlukweehu. Ninaakupali wiira Nluku khanoona paasi mawarelweehu. (1 Samuweli 16:7) Masi, nathukumanaka wiira ninswalele, itthu impheeleseehu uri umoonihera ihisima Nluku ni ciicammo uwoonihera ihisima ale anaaswalaneehu nkhayi. Weeriyaka wiira nimpheela urwaa umoonanana mwene awula presidente, pooti ukhalaka wiira nanhala uwara saana wiira noonihere ihisima. Phiitthu imocaaru, inanna ninwareehu ni nineelokihaceehu woorwaa mmikutthaanoni ninawoonihera wiira ninanhisimu ule khanle “Mwene o ilapo cotheene”, Yehova Nluku, ni nipuro nawe ninonswaleleehu.—Jeremiya 10:7.

Kontha nimpheela uhisimu mattharelelo o mbiilyani aneettihera ukumiihu. Ibiiblya inawaakurumica makristau uwara “niinanna yomaana ni woohiisamiha.” (1 Timotiyu 2:9, 10) Uwara ikuwo “niinanna yomaana” maanaaya wiira, ntthuuyo haana unyema uwara khula ikuwo inkumiheriya naapinaatamu ahooleliheraka ucinkari, unyema uwara ikuwo coohiloka uwariya waatthuni ni cowoonnyaaca. Uhiya commo, uhipheela ‘wiisamiha’ unaanikavihera uthanla ikuwo comaana coohinthanyiha ntthu. Ala mattharelelwaala khanonkhottiiha ntthu uthanla ikuwo cinoncivela masi cakhalaru cooreera uwara. Hiivano hataa woohuuluma itthu, pooti ‘ureeriha ile ineetthucihaawe moopoliihu’ ni ‘unttitthimiha Nluku’ nlattu woowara saana niinanna yoocivela. (Titu 2:10; 1 Peturu 2:12) Nlattu woowara saana ukati ninrweehu mmikutthaanoni, pooti waakavihera atthu ulakela unswalela Yehova.

Nhooceele urwaa Usalau yo Umwene nlattu wo ikuwo cirineenyu. Ikuwo cihu pooti uhikhala consurukhu mwinci ni cootepa ureera, masi cakhalaru comaana ni cooreera uwara waatthuni.

• Kontha isiyani inanna ninwareehu ukati ninonswaleleehu Nluku ikhanlyaaya itthu yuulupale cinene?

• Matthareleloni aneettihera inanna ninwareehu ni nineelokihaceehu?