Ngimba muketile mukabuku aka, muno Abaketi ba Yehova bofwalila kanunu linga bali pa ngomano syabo? Nongwa yafiki tufwala kanunu?

Tukungindika Kyala witu. Bwanaloli ukuti Kyala atoketa muno tufwalila, loli oketa indumbula syitu. (1 Samueli 16:7) Linga tubungene ukuti tumwipute Kyala, ubwighane bwitu kokungindika Kyala kangi ughindika abinitu aba tukwiputa nabo pampene. Tufwanikisye ukuti tupeliwe ulusako lwakwaghana nu Mwalafyale pamo Pulezidenti. Ngimba tubaghile ufwala bulebule? Tukabaghila ufwala mwalwemwalwe nongwa yakuti tumenye ukuti umwene wapamwanya. Mo sili linga tuli pangomano syitu, tufwala kanunu ukuti tungindike ‘Untwa Kyala uyu aliko bwila na bwila,’ kangi tubomba isi unangisya ukuti tughindika amalo agha tukumwiputilapo Kyala witu.—1 Timoti 1:17.

Tukonga isi tumanyila. IBaibolo likuti abaKristu bafwaleghe ‘imyenda iyi yibabaghile.’ (1 Timoti 2:9, 10) Ufwala imyenda ‘iyi yibabaghile’ kokuti tufwaleghe kanunu, tungafwalagha imyenda ukuti abandu batubone pamo unangisya umbili nuswighisya abandu. Ukwinoghonela abangi kututula ukuti tufwaleghe imyenda iyi yikukolelana nifundo sya m’masyu gha Kyala. Ifundo sya m’Baibalo isi sikutupa ulusako lwakusala twibene imyenda yofwala. Ufwala kwitu kanunu kututula ukuti ‘tubonesyeghe ulumanyisyo lwa Mpoki witu Kyala’ nu ‘kuntufya.’ (Titi 2:10; 1 Peteri 2:12) Ufwala kwitu kanunu kutula abandu umanya kangi nukungindika Yehova uyu tukumwiputa.

Mungitikisyagha utoliwa ubuka kungomano panongwa ya myenda. Imyenda yitu, yitolondiwa ukuya ya pamwanya ukuti yiye yakubabaghila pamo minunu.

• Ufwala kanunu pangomano, ngimba kulondiwa bulebule?

• Ngimba fundo siki isi situtula usala kanunu imyenda?