¿Ckaanqui dibujuspi cá folletumanta ima Jehóvap testigusnin tantacunasman ’rincu alli vestisckas? ¿Imajchus allít vesticuycu, ñajchacuycu y limpius caycu?

Tata Yayayshta respetasckaycuraycu. Tata Yaya manalla ckaan aparentasckaycuta (1 Samuel 16:7). Áicap tantanacuycu Yayát adoráypaj, munaycu respetút ckaachiyta payraycu y huauckesniycuraycu. Si suj juespa ñauckenpi tianaycu tían, ckaaycu si alli vestisckas tiaycu imaraycu chá persona ancha importante can. Quiquin can áicap vesticuycu tantacunasman ’ríypaj, ckaachinaycu tían ima Jehovát anchát apreciaycu pi «Jues túcuy ashpamanta» can, y lugartapas maypi adoraycu (Génesis 18:25).

Ckaachiycu ima laya persunas caycu. Biblia cristianusta yachachin «Modestiaan y alli juiciuan» vesticuyta (1 Timoteo 2:9, 10). «Modestiaan» vesticuyta niyta munan mana churacuyta ropa ima ashca ckoshcke valechun, o deshonesta cachun o provocachun. Astaanpas, si «alli juiciuan» vesticuycu, súmaj ropasta ajllasajcu, mana ushulu ina, ni descuidascka ina. Yachas cá principius sapa suj ajllayta atin imaina vesticuyta. Allít vesticus «Yaya, ckeshpichejniyshpa yachachinanta [sumajyachiyta]» atin y honrát ckoyta mana ni imatapas nis (Tito 2:10; 1 Pedro 2:12). Allít vesticuspá tantacunasman ’ríypaj, ’ruayta atin gente allít pensananta Jehóvap pueblunmanta.

Limpius y alli vestisckas tianaycúpaj mana ashca ckoshckét precisaycu ropata ’rantinaycúpaj. Chayraycu tantacunasman ’ríypaj ropayquiraycu ama desanimacuychu.

• ¿Imajchus importante can, imaina vesticuycu áicap Yayát adoraycu?

• ¿Ima principios Bibliamanta yanapaaycu yacháypaj imaina vesticunaycu tían?